اسلام آباد۔ 02 اگست (اے پی پی) کامن ویلتھ انا سیکرٹری جنرل آرٹی پیٹر یشیا سکاٹ لینڈ پرائم منسٹر یوتھ پروگرام نا چیئرمین رانا مشہود احمد خان ءِ ورناتے واکدار کننگ کن اوفتا بدل مفروک عزم و خواری آ ’’کامن ویلتھ ایئریوتھ چیمپئن‘‘ نا ایوارڈ تس۔ وزیراعظم یوتھ پروگرام نا گام گیج نا نمائش و اجرانا بنائی دود اڈ ہلک ۔ دولت مشترکہ نا سیکرٹری جنرل پیٹریشیا سکاٹ لینڈ پارے کہ رانا مشہود ورناتے وارخواہی ، وسیلہ و کمک فراوان کننگ و چندی گام گیج و پروگرام تا کمک اٹ اوفتے واکدار کننگ کن اہم گام گیج و شاندار کاریم کرینے۔ اوفتا خذمت آتے امنا کرسا او رانا مشہود تون دولت مشترکہ نا روایت آتا رداٹ مسہ وار منت واری ءِ ہرفے۔ اوپارے کہ دولت مشترکہ پاکستان نا ورناتیکن وزیراعظم یوتھ پروگرام ٹیم انا ہمت و عزم انا اعتراف ءِ کیک انتئے کہ ورناک ہی بدلی اتنگ نا محرک ءُ۔ دولت مشترکہ نا سیکرٹری جنرل بٹن ءِ خلسا وزیراعظم یوتھ پروگرام نا شش گام گیج آتا بناءِ کرے ہرافتے ٹی کامن ویلتھ ایشیایوتھ الائنس ، ڈیجیٹل لرننگ پورٹل، قومی رضاکار کور اکن لوگو، برٹش کونسل وانٹیل کارپوریشن نا کمک اٹ اے آئی ایجوکیشن پروگرام و کامن ویلتھ یوتھ پارلیمنٹری فورم نا جوڑ کننگ اوار ءِ۔ داکان مست داوخت آ تران کرسا چیئرمین وزیراعظم یوتھ پروگرام رانا مشہود دولت مشترکہ نا سیکرٹری جنرل پیٹریشیا سکاٹ لینڈ نا پاکستان و دولت مشترکہ تون تعلقداری تے سوگو کننگ کن مہرومریبت و جوزہ نا اعتراف ءِ کرے۔ اوپارے کہ پاکستان و دولت مشترکہ نا نیام اٹ تین پہ تینی است خواہی ورناتا شونداری پروگرام تا چندی بشخ آتیٹی کمکاری ءِ مون آ دننگ اٹ کمکار مریک۔ اوپاکستانی ورناتا لائخی تیا زور شاغا و اوفتا شونداری ءِ مون آ دننگ کن یوتھ پروگرام نا کمک اٹ بناکروک گام گیج آتے مون آتخا۔ ایسر اٹ پیٹریشیا سکاٹ لینڈ بلوچستان آن تعلق تخوک آ قومی رضاکار کور نا لوگو نا ڈیزائنر اقصیٰ ءِ اسہ لکھ روپئی انعام تس وخت اس کہ چندی بشخ آتیٹی شاندار کارکڑد آ چندی تعلیمی ادارہ غاتا طالب علم آتے پرائم منسٹر موٹیویشنل ایوارڈ تننگا۔ چیئرمین رانا مشہود کامن ویلتھ نا جنرل سیکرٹری پیٹریشیا سکاٹ لینڈ ءِ دولت مشترکہ نا ملک و پاکستان نا شونداری کن اوفتا خذمت آتیا سووینئر اس ہم پیش کرے۔
