اسلام آباد۔ 02 اگست (اے پی پی) قومی اسمبلی ایران اٹ مسکوہی فلسطینی وزیراعظم اسماعیل ہنیہ نا شہیدی نا بابت قرارداد اس اتنگ و ایوان اٹ باسک آتے داوخت آ تینا گپ وتران نا موقع تننگ کن وقفہ سوج آتا کارروائی تے معطل کننگا۔ جمعہ نادے آ قومی اسمبلی ٹی گپ وتران کرسا بنجائی وزیر پارلیمانی امور اعظم نذیر پارےکہ دیوان نا بناکننگ آن مست اسپیکرچیمبر اٹی حکومتی سیوت و ایلو جماعت آتا اسیجائی دیوان اٹی فلسطین نا مسکوہی وزیراعظم اسماعیل ہنیہ نا شہیدی نا بابت قرارداد اس اتنگ و باسک آتا کنڈآن گپ وتران کننگ کن مختص کننگانے، اسمبلی اینو نا دیوان بیرہ اسہ ٹکی ایجنڈاغامریک۔ اوپارے کہ متحدہ اپوزیشن و حکومتی سیوت اواری اٹ دابابت قرارداد اسے نا منظوری ءِ ایتر تانکہ دنیا ءِپاکستان نا کنڈآن اسہ اسیجائی کلہو اس رسینگے۔ ہندا رداٹ داطے کننگانے کہ اینو نا دیوان اٹی بیرہ اسہ ٹکی ایجنڈاغا ہیت مریک۔ وزیر پارلیمانی امور اعظم نذیر تارڑ قومی اسمبلی نا قواعد و ضابطہ نا رداٹ تحریک پیش کرے کہ وقفہ سوج آتے موخر کننگے تانکہ ایوان اٹ اسماعیل ہنیہ نا شہیدی نا بابت قرارداداس اتنگ مرے۔ قومی اسمبلی تحریک نا منظوری ءِ تس۔
