گوازی تا پِڑ تے آباد کننگ ءِ اولیت ایتنہ، مکس مارشل آرٹس بشخ اٹی حکومت پاکستان فیڈریشن تون پورو کمک کیک، وزیراعظم شہباز شریف

اسلام آباد۔ 11 ستمبر (اے پی پی) وزیراعظم محمد شہباز شریف پارینے کہ پاکستان نا غٹ آن بھلامیرات لائخ آ ورناک ءُ، پاکستان اٹ گوازی تا پڑتے آباد کننگ ءِ حکومت اولیت ایتک، مکس مارشل آرٹس بشخ اٹی حکومت پاکستان فیڈریشن تون پورو کمک کیک۔ داخیال آتا درشانی ءِ او پاکستان مکس مارشل آرٹس فیڈریشن نا عہدیدار و گوازی گرآتون گپ وتران کرساکرے ہرافک چارشنبے نادے آ داڑے اوڑتون اوڑدہی کریر۔ اوڑدہی کروک آتیٹی صدر پاکستان مکس مارشل آرٹس فیڈریشن عمراحمد، چمپیئنز ایمان خان، بانوبٹ، بریوکامبیٹ فیڈریشن ونرز رضوان علی، ضیاء مشوانی واسماعیل خان ئسک اوار ئسر۔ داوخت آ بنجائی وزیر حوالکاری وشینکاری عطاء للہ تارڑ، وزیر مملکت انفارمیشن ٹیکنالوجی شزہ فاطمہ خواجہ، چیئرمین وزیراعظم یوتھ پروگرام رانامشہود احمد خان، وزیراعظم نا کوآرڈی نیٹر ز رومینہ خورشید عالم ، بدر شہباز و تعلقدار بڑزکوکمامدارآک بشخ ہلکر۔ وزیراعظم پارے کہ پاکستان نا غٹ آن بھلا میرات پاکستان نا لائخ آ ورناک ءُ، انٹرنیشنل مکس مارشل آرٹس فیڈریشن ایشیئن چیمپئن شپ اٹی پاکستان نا گوازی گرآک 12 میڈل ءِ کٹسا ملک وقوم انا کاٹم ءِ گمر اٹ بڑزکرے، کنا پبی است خواہی ءِ کہ پاکستان نا گوازی گر آک ہنداوڑ جہانی کہو ل آ مقابلہ غاتیٹی ملک وقوم انا پن ءِ روشنا کرساکیر، نم غٹ گوازی گرآتون ملسا بھاز خوشی مس، نم پاکستان نا نہادی سرمایہ غا ک اورے، نما غٹ انا لائخی تے خنسا است جم مریک کہ پاکستان نا آخبت روشناءِ۔ اوپارےکہ مکس مارشل آرٹس نا بشخ اٹی حکومت پاکستان فیڈریشن تون پورو کمک کیک، پاکستان اٹی گوازی نا پڑتے آباد کننگ حکومت نا اولیت ءِ۔ وزیراعظم پارےکہ خادم پاکستان نا زمواری تے سنبھالنگ آن پد پاکستان اسپورٹس انڈاؤمنٹ فنڈ، گوازی تا مقابلہ و گوازی گر آتا سلیکشن کن شفافیت ءِ پک کننگ کون آ گام گیج کرین۔ اوپارے کہ بطور وزیراعظم ای تینا دا فرض تکیوہ کہ پاکستان نا گوازی گر آتا جہانی مقابلہ غاتیٹی بشخ ہلنگ کن ہروڑنا کمک فراوان کننگے، مکس مارشل آرٹس فیڈریشن نا پاکستان اٹ جہانی مقابلہ غاتا اڈتننگ ستاکڑزک۔ داوخت آ وزیراعظم ءِ زوت آتے اٹ فیڈریشن و وزیراعظم یوتھ پروگرام نا کمک اٹ اڈ ہلوک مکس مارشل آرٹس نا جہانی مقابلہ غاتا بارواٹی معلومدار کننگا ہرافتے ٹی 18 ملک آتیان 300 اتھلیٹ بشخ ہلکر، پاکستانی اتھلیٹ آک 4 سلورمیڈل ہم دوئی کریر وخت اس کہ پاکستان نا اِرا زالبول فائٹرز گولڈ میڈل کٹار۔ گولڈ میڈل کٹوک آ گوازی گرآتیٹی ایمان خان و بانوبٹ آن بیدس ایلو گوازی گرآک وزیراعظم ءِ تینا تینا کارکڑد نا بارواٹی پاریر۔ وزیراعظم ءِ مکس مارشل آرٹس نا بشخ انا شونداری کن سلاہ ہم پیش کننگا۔ وزیراعظم تعلقدار کمامدارآتے سلاہ تیا سجفنگ و سلابت کرسا زوت عملدرآمد کن لائحہ عمل اس پیش کننگ نا پارت کرے۔