غٹ سیاسی جماعت آک اواری اٹ بایدے چلینگر، اسہ ایلو تون لگرہ تو پارلیمان نا وقار مجروح مریک، نائب وزیراعظم اسحاق ڈار

اسلام آباد۔ 11 ستمبر (اے پی پی) نائب وزیراعظم محمد اسحاق ڈار پارینے کہ جمہوریت و آئین نا سوگوی کن غٹ سیاسی جماعت آک اواری اٹ بایدے چلینگر، اسہ ایلوتون لگرہ تو پارلیمان نا وقار مجروح مریک۔ چارشنبے نا دے آ قومی اسمبلی نا دیوان اٹی گپ وتران کرسا ڈپٹی وزیراعظم محمد اسحاق ڈار پارے کہ سیاست ضرور کننگے ولے خیسن آ لکیر ءِ بایدے گدرینگپ۔ اوپارے کہ مستین اٹی میثاق جمہوریت کن فروری 2002 ٹی پی پی پی و مسلم لیگ نا نیام اٹ گپ وتران بناکرے، داکان مست ننا اسہ خرین ءُ تاریخ اس رہینگاسس، ہڑتوم آجماعت آک آئین نا بحالی و جمہوریت نا سوگوی کن مئی 2005 ٹی میثاق جمہوریت آ دستخط کریر، اوکان پد ایلو غٹ سیاسی جماعت آتے ہم سلہ خلنگا، اوٹی عمران خان تینٹ ساڑی ئس، دادستاویز آتے غٹ جماعت آک پک کریر۔ اوپارے کہ اگہ نن اسہ ایلوتون لگسا کینہ تو پارلیمان نا وقار مجروح مریک۔ تدوک آ دور ءِ حکومت اٹی اگہ پروڈکشن آرڈرجاری متو تو المی اف کہ داسہ جاری مف۔ اوپارے کہ ہرا کمیٹی ناہیت مننگ ءِ او او کمیٹی نا تائید ءِ کیک، نن ملوک آہست اٹ ہُرن کہ  ہمو ملک ہرا 2017 اسکان دنیا نا 24 می بھلا زرگزران ئس او 2022اٹی47زرگزران امر جوڑ مس۔ نن بایدے ہرن کہ انسداد دہشت گردی آ ارب آ ڈالر خڑچ مس و دہشت گردی چٹا تو انت سوب ءِ کہ او دہشت گردی دُوارہ ترندی اٹ کاٹم ہرفنگ ءِ، نن بایدے داناجاچ ءِ ہلین۔ پروڈکشن آرڈر اسپیکر نا استحقاق ءِ، اسپیکر غٹ جماعت آتا کمیٹی اس جوڑ کے جینوین ٹی او آرز ایتے تانکہ ملکی ویل آتا ایسری کن کسر اسے نا تعین  مننگ کے۔ حکومت دا رداٹ پورو کمک فراوان کیک۔