اسلام آباد۔ 11 ستمبر (اے پی پی) بنجائی وزیر داخلہ محسن نقوی قائد اعظم محمد علی جناح نا سیاسی پامداری و کماشی ءِ شاندار لوز آتیٹی خراج عقیدت پیش کرسا پارینے کہ سخت جہد، بدل مفروک عزم، بڑزحوصلہ و ایمانداری قائد اعظم نا شخصیت ءِ ممتاز کیک۔ قائد اعظم محمد علی جناح نا 76 می کزیہ غا تینا کلہو اٹی وزیرداخلہ محسن نقوی پارے کہ قائد اعظم نا جیرت مندانہ کماشی آن بیدس آجووطن نا تغ اسُل پورو مننگ کپک۔ قائدا عظم نا دا احسان ناقیامت اسکان بدلہ ءِ تننگ کپنہ کہ اینو نن بحیثیت قوم آجو وطن اٹ ساہ ہلنگ اُن، اینو قائدا عظم نا اصول آتیا عمل کننگ نا اخس گرج ءِ شاید مہالو اسُل الوکہ۔ اوپارے کہ قائد نا پاکستان اٹی کس اسے لسانی ، تپہ ئی و گروہی بنداوتیا فوقیت دوئی اف۔ قائد اعظم نا پاکستان اٹی اقلیت آتون اوار ہر اسٹ ءِ اسہ وڑ حق دوئی ءِ۔ بدبختی اٹ قائد اعظم نا روشنا اصول آتیا عمل کپرسا نن اقوام عالم اٹی پدی رہینگانن۔ محسن نقوی پارے کہ قائد اعظم نا روشنا اصول و روشنا راہشونیک ننکن کسر نا ڈیوا ءُ۔ قائد نا راہشونی تیا ہِننگ اٹ ہی پاکستان نا شونداری نا راز تخو ک ءِ۔ اوپارے کہ قائد اعظم نا عظیم پدریسہ جہد ءِ پاکستانی قوم اسُل است آن دننگ کپک۔نن داعزم ءِ کین کہ قائدا عظم نا اصول آتا رداٹ ملک انا شونداری و سوگوی کن تینا زمواری تے پورو کینہ، ببو داقول ءِ پوسکن کین کہ نن سیوت، تنظیم و یقین محکم اتون مون آ کانہ۔
