اسلام آباد۔ 11 ستمبر (اے پی پی) ڈپٹی چیئرمین سینیٹ سیدال خان پارینے کہ قائد اعظم محمد علی جناح ؒ عظیم ءُ راہشون و ذہین ءُ انسان اس ئس، پاکستان نا جوڑ مننگ اونا سخت کوشست آتا بھرم ءِ۔ چارشنبے نادےآ سینیٹ سیکرٹریٹ آن جاری بیان نا رداٹ قائد اعظم محمد علی جناح نا برسی نا وخت آ اوتینا کلہو اٹی سیدال خان پارے کہ قائد اعظم محمد علی جناح اسہ عظیم ءُ راہشون و ذہین ءُ انسان اس ئس، اوتینا بڑزکوکڑد، مستقل مزاجی و پدریسہ جہد آن برصغیر نا مسلمان تیکن پاکستان نا جوڑ مننگ ءِ پک کرے، قیام پاکستان قائد نا سخت خواری تا بھرم ءِ، مچ آ قوم بانی پاکستان نا بے مٹ خذمت آتے خراج عقیدت پیش کیک۔ اوپارے کہ بابائے قوم دوراندیشی و سیاسی بصیرت اٹ قوم انا تقدیر ءِ بدل کننگ کن سیوت، ایمان و نظم وضبط کون آ راہشون اصول جوڑ کرے، اومسلم لیگ اٹی شمولیت اختیار کرسا تحریک پاکستان اٹ پوسکن ءُ ساہ اس شاغا ہراپاکستان نا جوڑ مننگ نا مزل ءِ عملی دروشم اس تس۔ ڈپٹی چیئرمین سینیٹ پارے کہ اینو ننے ہرامشکل مون تروک ءِ اوفتا مون ءِ توننگ کن کانود وآئین آ من وعن عمل کروئی مریک، ننے بانی پاکستان نا راہشون اصول آتیا عمل کرسا تینا آخبت ءِ روشنا کننگ کن ہروڑنا اختلاف آتے اسہ پلو تخسا پرامن، شون پسند، و جمہوری رویہ غاتے مون آ دروئی مریک۔ اونا پاننگ ئس کہ قائد اعظم محمد علی جناح نا خذمت ننکن کسر نا ڈیواءِ اونا فکر آ عمل درآمد کرسا نن ملک ءِ شونداری شونہالی نا کنڈآ دننگ و مون تروک ویل آتیان کشنگ کینہ۔ سیدال خان دعاکرے کہ اللہ تعالیٰ ننے غٹ ءِ قائد اعظم ؒنا نقشِ قدم آ چلینگسا وطن عزیز نا شونداری و شونہالی کن اواری اٹ کاریم کننگ نا توفیق عطاکے۔
قائد اعظم محمد علی جناح ؒ عظیم ءُ راہشون و ذہین ءُ انسان اس ئس، ڈپٹی چیئرمین سینیٹ سیدال خان
