اسلام آباد۔ 10 ستمبر (اے پی پی) بنجائی وزیر حوالکاری، شینکاری ، قومی میرات و دودوربیدہ عطاء اللہ تارڑ پارینے کہ ہرا تینا راہشون ءِ کشنگ کن پیش تماسر اوفک تینٹ بند مسر، اوفک سیاست اٹ غلط روایت شاغار، اوفتے سرپند کرینہ کہ خیال اٹ ہنبو، خار انا بج اوفک دسینو و فصل آتے ہم ہندافک روترہ۔ سے شنبے نادے آ قومی اسمبلی نا دیوان اٹی گپ وتران کرسا بنجائی وزیر حوالکاری پارے کہ ایوان اٹ تینا دامون ایمون خورک نشست آتے خنسا حیران اُٹ کہ درو نا واقعہ غان پد پد اوفتے ہندن ءُ دُوشہ اس گند کشا کہ مسہ شار مخلوق آن بیدس اسٹ اس ہم دانگیا بننگ نا جیرت کننگ کتو۔ اوپارے کہ نن اوفتے سرپند کرینہ کہ خیال اٹ ہنبو، زرس خداغان خلبو۔ اوپارے کہ مستین اٹ حکومتی بنچ آتیان اپوزیشن ءِ تقریر آتیان توننگاکہ، کسٹوڈین آف دی ہاؤس نا جاگہ غا پروڈکشن آرڈر جاری کننگ نا پارت وزیراعظم ہاؤس آن بسکہ و بانی چیئرمین پی ٹی آئی پاریکہ کہ ہراسٹ نا پروڈکشن آرڈر ءِ جاری کروئی ءِ و ہراسٹ نا کروئی اف۔ اوپارے کہ ہموتم آ اوفتے سرپند کریسن کہ وخت اسہ وڑ سلپک، اوسیاست نا تہہ ٹی غلط روایت شاغا، دااُسل متویسس کہ زالبول آتے سیاسی انتقام نا شست کننگاکہ۔ فریال تالپور ءِ عئید آن اسہ دے مست نوک ءِ خننگ نا نن آ ہسپتال آن زندان آ گدریفنگا و پاننگاکہ ای خواوہ کہ اونا ایلم ءِ تکلیف رسینگے، اونا ایلم اسکان کلہو کائے کہ اونا بے گناہ ایڑھ ءِ ہسپتال آن زندان آ گدریفنگانے۔ اوپارے کہ مریم نواز شریف نا اسہ کیس اسے ٹی بیل مس و دُوارہ ہراوڑاٹ دزگیری کننگا؟ داپاننگاکہ مریم نواز ءِ اونا باوہ نا مون آ دزگیرکننگے۔ بنجائی وزیرپارے کہ ہمووخت آ شہباز شریف صاحب نا کیس انا احتساب عدالت نمبر 3 اٹی سماعت ئس، نن عدالت پیش مسن و خواست کرین کہ شہباز شریف صاحب نا لمہ کزیت کرینے، اینو شرہ کننگپ ولے پاننگاکہ شرہ ہر حال اٹ مریک۔ شہباز شریف نا لمہ نا میت اُراٹی ئس و چار گھنٹہ کیس انا کارروائی چلینگا۔ اوپارے کہ ہمووخت انا شہزاد اکبر اینو ہراڑے کن ءِ ہراداڑے تولسا مخلوق نا لمہ ایڑھ تا برخلاف کیس جوڑ کریکہ، اینو وخت بس تو اوملک ءِ اِلا نرا۔ اوپارے کہ دا اینو انت ہیت اسے کن ہوغرہ، اونئے مستین آن سبخ ہلکنو و نئے داس آن، اوفتا آخبت تہارخننگک۔ اسہ پن انا وزیراعلیٰ اس جلسہ ٹی ادارہ غاتا برخلاف غلیظ زبان ءِ کاریم اٹ ایس، اونا صوبہ ٹی دہشت گردی ودنگ ءِ۔ سویلی خیبرپختونخوا نا تہہ ٹی ہڑدے دھماکہ و جلہو مننگ ءِ و اوفتے فکر ہی اف۔ داہمو ہیت مس کہ ہراتم روم ہشنگاکہ تو نیروچین نا بانسری خلککہ، داڑے تو نیرو کنٹینر آ سلسا غلیظ بولی ءِ کاریم اٹ ایسکہ، بے سہب جلسہ نا غصہ ءِ کشوئی ئس تو تینا مخلوق آ کشوسر، سٹیج آ لگسا ادارہ و مریم نواز شریف نا برخلاف ہرا بولی ءِ کاریم اٹ اتنگا بے کچ مذمت نا قابل ءِ، او زالبول صحافی تا برخلاف ہرا بولی ءِ کاریم اٹ اتنگا اونا ترندی اٹ مذمت ءِ کینہ۔ اوپارے کہ اسہ پوسکن ءُ فلم اس تیار کننگ کن سجفنگ اُن ہرانا پن ‘‘ ای لاہور آ ہنپرہ’’ مریک انتئے کہ داسہ کنا خیال ءِ کہ دا لاہور آ ہِننگ نا ارادہ ءِ یلہ کیرہ۔ اوپارے کہ دالشکر کشی انت ہیت اسے نا ءِ ، اوفتا 12 ءُ نیم سال آن خیبرپختونخوا ٹی حکومت ءِ، نم خیبرپختونخواٹی پی کے ایل آئی و راولپنڈی انسٹیٹوٹ آف کارڈیالوجی کون آ اسہ ہسپتال اس نشان ایتبو، دانش اسکول کونءُ اسہ اسکول اس نشان ایتبو، دافک سرکاری فنڈ آتے ہم تینا جندی تشہیر کن کاریم اٹ ایسُر۔ اوپارے کہ داوڑ اولیکو وار خنانن کہ دا تینا لیڈر ءِ کشفنگ کن بسر و تینٹ بند مسر۔ اوپارے کہ نن مہالو ہم اوفتے پہہ کرینہ کہ خار و بیر انا سیاست کپبو، دابج آتے اوفک دسینو، فصل آتے ہم ہندافک روترہ، ہموتم آ ہم اوفتے پاریسن کہ خیال اٹ ہنبو ولے اوفتے ننا ہیت سمجھ بتوکہ۔ بنجائی وزیر حوالکاری داوخت آ اسہ شئیر اس ہم پیش کرے کہ‘‘ دل کے دریاکو کسی روز اترجاناہے، اتنا بے سمت نہ چل لوٹ کر گھرجاناہے’’۔
