بنجائی وزیر احسن اقبال نا کماشی ٹی دیوان، پی ڈبلیو ڈی نا ڈٹ آتے صوبہ غاتیا گدریفنگ نا عمل اٹ  ترندی اتنگ نا فیصلہ

اسلام آباد۔ 10 ستمبر (اے پی پی) بنجائی وزیر ڈٹ بندی احسن اقبال نا کماشی ٹی دوشنبے نادے آ اڈ ہلوک دیوان اٹی تحلیل مروک آ ادارہ پی ڈبلیو ڈی نا بست وبند اٹی برجاشونداری ڈٹ آتے صوبائی حکومت آتیا گدریفنگ ناعمل اٹی ترندی اتنگ نا فیصلہ ءِ کننگانے۔  دیوان اٹی سیکرٹری ڈٹ بندی و چندی صوبہ غاتا بڑزکوکمامدارآک بشخ ہلکر۔ دیوان اٹی داہیت آ امنا کننگاکہ پی ایس ڈی پی ڈٹ آتے زوت آن زوت  صوبائی حکومت آتے گدریفنگک تانکہ دا ڈٹ آتیا کاریم بیدس اڑاند آن برجاسلنگ کے۔ وزیر ڈٹ بندی احسن اقبال پارینے کہ بیرہ ڈٹ آتے گدریفنگ انگ ءِ و دا ڈٹ آتے پی ایس ڈی پی نا رداٹ تروک آفنڈنگ برجاسلک۔ اوغٹ صوبہ غاتے پارت کرینے کہ او گدریفوک آ برجا ڈٹ آتا وزارت آتا پن اٹ ہفتہ نا تہہ  ٹی معلومدار کیر۔ بنجاٹی برجاپی ڈبلیو ڈی نا ڈٹ آتے ہم سی ڈی اے و تعلقدار وزارت آتیا گدریفنگک۔ اوپیدوار کرے کہ پی ڈبلیو ڈی نا کنڈآن برجاڈٹ آتے چٹفنگ پننگ انگ ءِ بلکن اوفتے بیرہ چندی ادارہ غاتیا گدریفنگ انگ ءِ۔ احسن اقبال پارےکہ بلوچستان دا بابت غٹ آن مست تینا کاریم ءِپورو کرینے و ایلو صوبہ غاتے ہم اسہ ہفتہ نا تہہ ٹی پورو سرجم فراوان کروئی ءِ۔ اوپارےکہ دا کمیٹی نا مسخت ہندائس کہ ہرامشکل آک مون تروک ئسر اوفتے کانود نا رداٹ ایسر کننگے۔ صوبہ غاتے زوت آن زوت گدریفنگ کن اوفتے ضلع غاتا رداٹ بشخنگک و ہرضلع ٹی ڈپٹی کمشنر ءِ فوکل پرسن کننگک ہرا پی ڈبلیو ڈی و تعلقدار ادارہ غاتون اواری اٹ غٹ معاہدہ غاتے رینڈم چار آن پنچ دے اٹی پورو کیک۔ ٹھیکیدار آتیان این اوسی ہلنگک کہ اوفتے سپانسر ایجنسی نا بدلی آ ہچ ءُ اعتراض اس اف۔ دا فیصلہ غان اومیت ءِ کہ شونداری ڈٹ آک وخت آ پورو مریرہ و الس ءِ فائدہ رسینگک۔