اسلام آباد۔ 10 ستمبر (اے پی پی) وزیردفاع خواجہ محمد آصف پارینے کہ تحریک انصاف تینا جلسہ ٹی نامناسب زبان ءِ کاریم اٹ ایس و بنجاپاکستان ءِ چیلنج کرے، ملک انا وجود ءِ اسہ بندغ اسے نا وجود اٹ المی گوندنگ سہی اف۔ سے شنبے نادے آ قومی اسمبلی ٹی پی ٹی آئی نا باسک علی محمد خان نا اعترافی ٹک انا ورندی آ گپ وتران کرسا خواجہ محمد آصف پارے کہ درو و ملخدو نا واقعہ غاتیا سرجمی اٹ شرہ مسنے ولے ہراتم دا پار کہ خان اف تو پاکستان اف تو دانا پین انت ری ایکشن اس بریک، ملک انا وجود ءِ اسہ بندغ اسے نا وجود اٹ المی گوندنگ سہی اف۔ تدوک آ نن انتس کہ مس او ملخدونا جلسہ نا ردعمل ئس۔ اوپارے کہ داایوان نا اریخ اٹی داوڑ اسُل متنے کہ داپریس گیلری و داایوان اسہ وڑ موقف تخر، ننا ہم و صحافی تاہم است آزاری مس، زالبول آتا بارواٹی نامناسب زبان ءِ کاریم اٹ ایسُر وبنجاپاکستان ءِ چیلنج کننگا۔ اونا پاننگ ئس کہ اقتدار اٹی و اقتدار آن جتائی آن پد پی ٹی آئی نا جہد ءِ ہبو، اوفتا جہد جمہوری قدر اتون مماثلت تخپک، اوفتا مچ آگپ وتران ملک انا سالمیت نا برخلاف ءِ، 9 مئی آ او مچ آ ملٹری ٹارگٹ آتے گچین کرے و اوفتا توہین ءِ کننگا، کرنل شیرخان نا مجسمہ ءِ پرغسا توہین کیر و 6 ستمبر آ ہمونگیا ہنسا دعاپاتیاکیر تو داڑآن زیات منافقت پین انتس مریک۔ خواجہ محمد آصف پارے کہ کنے آہم آرٹیکل 6 ءِ خلنگا۔ اوپارے کہ دا دِیر اس پاریسس کہ خان اف تو پاکستان اف، داملک انا تاریخ اٹی اسہ تہار ءُ دے اس ئس، اسہ صوبہ سے نا وزیراعلیٰ بنجاپاکستان ءِ ہکل تس ولدا اوکان پد پاہک کہ فوج ننا وشہیدآک ننا، داہراتم خوارہ ، بیانیہ ءِ بدل کیرہ۔ اوپارے کہ وزیراعلیٰ خیبرپختونخوا 15 دے اٹی بانی پی ٹی آئی ءِ رہاکرفنگ نا پڑوکریسس، 2 دے گدرینگانے نن اوفتا انتظار ءِ کننگ اُن۔ اوناپاننگ ئس کہ اسہ وزیراعلیٰ اس ہراتم مسن تا توہین ءِ کرے تو ہمووخت آ اوفتا ضمیر ہراڑے ئس، پنجابی ، پشتون، بلوچی و سندھی اواری اٹ پاکستان ءِ جوڑکیرہ، پشتون قوم آ کس اسے نا اجارہ داری اف، ہموڑے ہم محب وطن پاکستانی رہینگرہ۔
