اقوام متحدہ۔ 10 ستمبر (اے پی پی) پاکستان مچ آ دنیا نا ہاٹ سپاٹ اٹی اقوام متحدہ نا امن فوج اناکڑد و لائخی ءِ سوگو کننگ آ زور شاغسا سلاہ پیش کرینے کہ سلامتی کونسل ءِ جھیڑہ غاتا فریق آتا نیام اٹ امن معاہدہ غاتے مون آدننگ کن گچین سیاسی وڑوڈول اس بایدے ٹہیفنگے۔ اقوام متحدہ ٹی پاکستان نا آخبتی مندوب منیر اکرم 15 باسکی کونسل آن تران کرسا اقوام متحدہ نا امن فوج انا کارروائی تا جاچ ءِ ہلک۔ اوپیدوار کرے کہ داوڑنا وروڈول کن سلامتی کونسل نا باسک، خاص وڑاٹ آخبتی باسک آتا نیام اٹ زیات کمکاری نا گرج مریک۔ اوسویلی سوڈان و سوڈان نا جھیڑہ ئی علاقہ ابی ٹی پاکستانی امن دستہ غاتا سرسہب کوشست آتا حوالہ ءِ ترسا پارےکہ امن مشن تے بیدادی ءِ کم کننگ کن کمیونٹی نا کہول آ ہندی امن نا بست وبند آتے مون آدننگ آ ہم زور بایدے شاغنگے۔ سفیر منیر اکرم پارے کہ پاکستان اقوام متحدہ نا امن آپریشن تیٹی مریس و خڑکی کمکاری تخک۔ اوپارے کہ پاکستان اقوام متحدہ نا اولیکو مشن تیان اسہ یواین ملٹری آبزرور گروپ ان انڈیا اینڈ پاکستان (یواین ایم او جی آئی پی)، ہرانا قیام 1949ٹی متنازع جموں وکشمیر اٹی لائن آف کنٹرول (ایل اوسی ) آ جنگ بندی نا چاروکی کن کننگاسس، نا مہماندار مسنے۔ اومستی پارے کہ پاکستان 46 مشن تیٹی 230،000امن دستہ ہم تعینات کرینے و جہانی امن و سلامتی نا خذمت اٹی 181 امن دستہ گوہانے۔ اوپارے کہ ساڑی آ دور اٹی اقوام متحدہ نا امن مشن تے پوسکن و ودوک آ چیلنج آتون مون تننگ ءِ، ہرافتے ٹی بیدادی، دہشت گرد آتا کنڈآن تالان کروک آ ہڑدڑ، وسیلہ غاتا غیرکانودی اخراج و ڈوہدار سرجزآتیٹی سجفوک کسبی نیٹ ورک آتا اوار مننگ، ہندی جھیڑہ غاتیٹی پیشن نا نیام تمنگ، اقوام متحدہ نا امن کن وسیلہ غاتیا خلوک پابندی و باسک ملک، خاص وڑاٹ کونسل نا آخبتی باسک آتا کنڈآن متحدمخ تفی نا چٹفنگ اوار ءِ۔ سفیر منیر اکرم پارےکہ جہانی برادری ءِ خاص وڑاٹ اقوام متحدہ و سلامتی کونسل ءِ دا علاقائی تنظیم تا پورو مخ تفی ءِ بایدے کننگے۔
