کوئٹہ۔ 09 ستمبر (اے پی پی) بلوچستان اٹی 7دے ئی انسداد پولیو مہم بناکرینے، مہم اٹی 26 لکھ آن زیات چناتے پولیو آن بچفنگ نا پڑی کُنفنگ نا ہدف مقرر کننگانے۔ ایمرجنسی آپریشن سینٹر بلوچستان نا کوآرڈی نیٹر انعام الحق نا رداٹ کوئٹہ تون اوار بلوچستان اٹی 7 دے ئی انسداد پولیو مہم اینو9 ستمبرآن بناکرینے۔ انعام الحق پارے کہ پولیو مہم اٹی 11 ہزار 555نا خڑک ٹیمک بشخ ہلیرہ۔ ہرافتے ٹی 9 ہزار 247 موبائل ٹیم، 945 فکسڈ سائٹ و 595 ٹرانزٹ پوائنٹ اوار ءُ، مہم صوبہ ٹی ساڑی آ پولیو کیس و چاگڑدی وڑتیٹی پولیو دین نا ساڑی گری نا رداٹ بناکننگ ءِ۔ مہم اٹی 26 لکھ 55 ہزار آن زیات چناتے پولیو آن بچفنگ نا پڑی کنفنگک۔ اوغٹ لمہ و باوہ غاتیان خواست کرینے کہ صوبہ ٹی پولیو کیس نا ساڑی گری نا سوب آن لمہ و باوہ داخصوصی مہم اٹی پولیو ٹیم تون تینا کمکاری ءِ پک کیر انتئے کہ دامہم نا مسخت ساڑی آ پولیو دین نا ساڑی گری نا بناآ کننگ انگ ءِ۔ پولیو دین 20 ضلع غاتیٹی ساڑی ءِ اگہ لمہ و باوہ چناتے پڑی کنفپسہ تو دین صوبہ نا ایلو ضلع غاتیٹی ہم سرمریک ہراڑآن چناک پین بے رکھ مریرہ۔ اولمہ و باوہ غاتیا زور شاغانے کہ او تینا چناتا زند آتون گوازی کپس پنچ سال آن کم وئی نا غٹ چناتے پڑی ضرور کنفر، اگہ اوفتا چناس پولیو نا پڑی کُننگ آن رہینگانے تو ضلعی انتظامیہ تون رابطہ کیر۔ انعام الحق پارے کہ سول سوسائٹی، استادوعالم دین خصوصی وڑاٹ دامہم اٹی تینا کمکاری ءِ پک کیر۔ یات سلے کہ بلوچستان اٹی مسہ سال آن پد برجاسال چمن، ڈیرہ بگٹی، قلعہ عبداللہ، کوئٹہ، جھل مگسی، ژوب، قلعہ سیف اللہ و خاران اٹی پولیو نا 12کیس رپورٹ مسنے۔
