باغ۔ 07 ستمبر (اے پی پی) بنجائی امور کشمیر و گلگت بلتستان انجینئر امیر مقام پارینے کہ کشمیری الس پاکستان نا دفاع نا رکھوک ءُ، کشمیری و پاکستانی الس نا اسہ ایلو تون بے مٹ مہرومریبت ءِ ہرادے ہچ گہس چٹفنگ کپک، مقبوضہ کشمیر نا مظلوم مسلمان تے دنیا نا اسہ طاقت اس ہم آجوئی نا نعمت آن توننگ کپک، مقبوضہ کشمیر زوت آجو مرسا پاکستان نا بشخ جوڑ مریک، آزاد کشمیر جنت نظیر ءِ، دلفریت گل زمین اٹی سیل و سوات نا مون آ دننگ کن ہلہلہ ئی گام گیج نا گرج ءِ ، تحریک آجوئی کشمیر اٹی حکومت پاکستان کشمیر ی الس نا سیاسی و سفارتی کہول آ پبی مخ تفی ءِ برجاتخک، آزاد کشمیر نا الس ءِ بجلی و نت انا نہاد آتیٹی تروک سبسڈی داجاگہ ناا لس نا حق ئس حکومت پاکستان کشمیری الس ءِ پین آسراتی ایتک، آزاد کشمیر نا بڑزانگا مش زیبا انگا جھیل ، پژغن انگا جنگل، شفاف وہوک آ دِیر و ساف آب وہوا ءِ خنسا جنت نا گمان مریک، داعلاقہ غاتیٹی سیل و سوات نا شونداری کن پوسکن انفراسٹرکچر نا تفنگ ناگرج ءِ، حکومت پاکستان آزادکشمیر اٹی سیل و سوات نا شونداری کن خصوصی گام گیج کیک، وزیر امور کشمیر بیرپانی ٹی اندروٹ نالہ نا زی آ الس نا مشکل آتے خنسا دمدستی وڑاٹ آرسی سی پول انا تفنگ نا پڑو کرے۔ داخیال آتا درشانی ءِ او مسلم لیگ ن آزاد کشمیر لیبرونگ نا صدر راجہ سعید نا ہنکین بیرپانی اندروٹ اٹی تیان شرف اٹی تروک آ سُوارہ و مسکوہی اومیتدار اسمبلی حلقہ شرقی باغ مسلم لیگ ن نا سینئر راہشون چوہدری اعجاز کٹھانہ نا کنڈآن بیابخیری دود اٹی گپ وتران اٹی کرے۔ داوخت آ مسلم لیگ ن آزاد کشمیر نا جنرل سیکرٹری و مسکوہی وزیر چوہدری طارق فاروق، مسکوہی وزیر تعلیم بیرسٹر سید افتخار گیلانی، ملک ذوالفقار ، میئر مظفرآباد سید سکندر گیلانی، صدر پریس کلب اکمل عارف، مسلم لیگ ن ضلع باغ نا صدر راجہ عبدالحفیظ کفل گڑھوی ، حلقہ ونیامی باغ انا صدر عظمت منہاس ، مسکوہی ایڈمنسٹریٹر، سعید انقلابی، ملک آفتاب اعوان ، راجہ خورشید عالم ، سیبل چغتائی ، مرتضیٰ شاہ ، ڈاکٹر راجہ عبدالحفیظ ، راجہ رضوان و ایلوفک ساڑی ئسر۔ وزیرامور کشمیر تدوک آ دے اِرادےئی دورہ غا باغ آ بس تینا دورہ ٹی او دھیرکوٹ، بیرپانی، لسڈنہ، باغ شار اٹی مسلم لیگ ن نا عہدیدار آتاکنڈآن تیان شرف اٹی تروک آ بیابخیری ٹی بشخ ہلک۔ وزیر امور کشمیر آزاد کشمیر نا زیبا سیل و سواتی ہند آتا جوان ستاءِ کرے و پارےکہ دا علاقہ غاتیتی سرمائی و گرمائی سیل و سوات نا بھاز بھلو پوٹنشل اس ساڑی ءِ ، سیل و سواتی تا آسراتی کن پوسکن آ سراتی تا فراوانی کن زوت گام گیج کننگک۔
