حکومت بلوچستان ورناتے ریاست نا خڑک اتنگ کن یوتھ پالیسی اس منظور کرینے، وزیراعلیٰ بلوچستان

کوئٹہ۔ 28 اگست (اے پی پی) وزیراعلیٰ بلوچستان میر سرفراز احمد بگٹی پارینے کہ حکومت بلوچستان ورناتے ریاست نا خڑک اتنگ کن یوتھ پالیسی اس منظور کرینے، اقلیتی و خواجہ سرا تے باعزت روزگار و بلوچستان نا زموار شاری  جوڑ کننگ کن تاریخی تعلیمی پروگرام نا بناءِ کننگانے، جمہوریت پن ہی سروس ڈلیوری نا ءِ، حکومت بلوچستان ہر ضلع ٹی بے پرخ شونداری ڈٹ آتے برجاتخک۔ داخیال آتا درشانی ءِ او شہید بینظیر بھٹو اسکالر شپ پروگرام نا رداٹ بلوچستان ایجوکیشن انڈومنٹ فنڈ انا کمک اٹ طالب علم آتیٹی تعلیمی اسکالر شپ چیک آتا بشخنگ نا دود آن تران کرسا کرے۔ داوخت آ صوبائی وزیرآک، چیف سیکرٹری بلوچستان، صوبائی سیکرٹری تتون اوار ایلوکمامدارآک ساڑی ئسر۔ دودا ٹی وزیراعلیٰ بلوچستان نا کنڈآن طالب علم آتیٹی چیک بشخنگا۔ بشخ ہلوک آتیان تران کرسا وزیراعلیٰ بلوچستان ورناتے پارےکہ نم بلوچستان و پاکستان نا آخبت آک اورے، صوبائی حکومت اینو تینا قول ءِ وفاکرے۔  وزیراعلیٰ بلوچستان پارے کہ طالب علم آتیکن داپروگرام ءِ پین ودفنہ تانکہ بلوچستان نا دا نیزگار ہُشار چناک گچین تعلیمی درسگاہ تیٹی علم دوئی کرسا صوبہ و پاکستان نا پن ءِ روشنا کیر، شہید و اقلیت آتا چناو ضلع غاتیٹی نمان پوزیشن ہلوک آ طالب علم آتے ہم داپروگرام نا بشخ جوڑ کننگک۔ اوپارےکہ ننا راج انا گوجالنگوک آ تپہ ٹرانس جینڈر ءِ ہرافتے ریاست ہندا ملک انا زموار شاری منسا باعزت روزگار نا وارخواہی فراوان کننگ کن سنبرینگوک ءِ۔ بلوچستان انڈوومنٹ فنڈ انا رداٹ بندغ آتے ہم تکنیکی مہارت آتا وارخواہی فراوان کننگک۔ اوپارے کہ صوبہ ٹی محرومی تے مُر کننگ کن المی ءِ کہ تعلیم نا دوئی کننگ ءِ آسان کننگے و داڑکن تعلیم نا فراوانی تون اوار ورناتےتکنیکی وفنی مہارت فراوان کننگ نا پروگرام نا ہم بناءِ کننگانے ، داپروگرام نا اسہ بشخ ہرانا رداٹ 30000ورناتے تکنیکی تعلیم فراوان کننگ نا پروگرام آ عملدرآمد کننگ انگ ءِ ہراڑآن بے روزگاری ٹی کمتی واقع مریک۔ وزیراعلیٰ بلوچستان میر سرفراز بگٹی پارے کہ تدوک آ دے مروک آ دہشت گرد ی نا واقعہ غاک افسوزناک ءُ، بلوچ روایت آتیٹی بے گناہ و کودک اسے نسلی بنداو تیا بس آتیان دڑفسا خلنگپک، بلوچ ورناتے سجفوک ایجنڈاسے نا رداٹ ریاست آن مُر کننگ انگ ءِ۔ اوپارے کہ صوبہ نا ورناتے ریاست نا خڑک اتنگ کن یوتھ پالیسی ءِ کابینہ غان منظور کرفنگانے ورناتے آسان قسط آتیا اخوت پروگرام نا کمک اٹ تینا کاروبار اسے نا بناءِ کننگ کن وام تننگ انگ ءِ۔ میرٹ و شفافیت ءِ پک کننگ کن نوکری خالصتاکنٹریکٹ نا بنداو آ تننگک۔ داڑکن غٹ ءِ تینا ملک و ریاست تون مہرومریبت نا شاہدی تروئی ءِ  و ای قول کیوہ کہ میرٹ وشفافیت ءِ پک کیوہ، ہرضلع ٹی بے پرخ شونداری ڈ ٹ آتے برجاتخنگک  صوبائی حکومت نمے نما تعلقدار ضلع ٹی مروک آ شونداری ڈٹ آتیا پیش رفت نا بابت نمے رسینگ فراوان کیک جمہوریت پن ہی سروس ڈلیوری نا ءِ، ای قول کیوہ کہ کس اسے نوکری تے سودا کننگ کن الیپرہ، کس اس نمے آن نوکری کن پیسہ خوائے و اونا ویڈیو ءِ جوڑ کرسا کنے آ راہی کبو ، علم دوئی کننگ ہی قوم تا شونداری و شونہالی نا اسٹ انگا کسر ءِ۔ اوورناتے مخاطب کرے وپارے کہ نمے غٹ ءِ سوسائٹی نا شونداری و شونہالی ٹی تینا کڑدءِ ادا کروئی ءِ۔