لاہور۔ 25 اگست (اے پی پی) نائب وزیراعظم و وزیرخارجہ اسحاق ڈار پارینے کہ وزیراعظم محمد شہباز شریف قومی ادارہ غاتیٹی اصلاحات اتنگ کن دے و نن خواری کننگ اٹی ءِ، شہباز شریف نا کماشی ٹی زرگزران دُوارہ بحالمریک، نن پاکستان ءِ دنیا ٹی زرگزرانی وڑاٹ باوقار ءُ ملک اس جوڑ کرین۔ داخیال آتا درشانی ءِ او حضرت داتا گنج بخش نا عرس مبارک اٹی بشخ ہلنگ نا وخت آ میڈیا تون گپ وتران کرساکرے۔ داوخت آ صوبائی وزیرخور بلال یاسین و ایلوفک ہم ساڑی ئسر۔ نائب وزیراعظم اسحاق ڈار پارے کہ اللہ نا فضل ءِ ، مہالو ہم وزیرخزانہ رہینگاٹ، داوار کنے کیہی زمواری ملانے۔ اوپارے کہ داٹی ہچ ءُ دورائے اس اف کہ پاکستان ءِ زرگزرانی وڑاٹ بھاز نسخان مس، پاننگاکہپاکستان ءِ مین آن کشنگ اٹ 15 سال لگک ولے محمد نواز شریف نا حکومت اٹی اللہ نا فضل اٹ پاکستان ءِ مشکل آتیان کشنگ اٹ بیرہ 3نیم سال لگا، 2013ٹی ہژدہ ، ہژدہ گھنٹہ نا لوڈشیڈنگ ئس، اسہ دے اٹی کیہی دہشت گردی نا واقعہ مسکہ، زرگزران بھسکار ئس، ولدا اللہ تعالیٰ کرم کرے، مسہ نیم سال اٹی غٹ ویل آک ایسر مسر، لوڈشیڈنگ چٹا، دنیا ننا زرگزران نامعترف مس وپاننگا کہ ہراوڑ پاکستان شون ہلنگ ءِ دا زوت جی 20 ٹی اوار مریک۔ اوپارےکہ محمد نواز شریف ناکماشی ٹی 2017 ٹی پاکستان دنیا نا 24 می بھلو زرگزران ئس ولے اوکان پد بروک آ چار سال آتیٹی پاکستان زرگزرانی وڑاٹ 47 می نمبرآ بس و دا چنکو نسخان اس اف، اینوہرا ملک انا ویل آک ءُ دا ہنداسوب آن ءُ۔ اسحا ق ڈارپارے کہ وزیراعظم محمد شہباز شریف نا کماشی ٹی ننا کوشست ءِ کہ زرگزران بحال مرے و نن دُوارہ پاکستانی تیکن آسانی ودی کین۔ اوپارے کہ وزیراعلیٰ پنجاب مریم نواز شریف نا گام ستاکڑزک ہراٹی اوچِل ءُ شش ارب روپئی جتا کرسا پنجاب نا الس ءِ بجلی نا یونٹ اٹی چانڑدہ روپئی نا ریلیف تسنے۔ داکان مست شہباز شریف کابینہ نا منظوری آن 200 یونٹ کاریم اٹ اتوک آتے پنجا ارب روپئی نا سبسڈی تسنے۔ اوپارے کہ کنا ایمان ءِ کہ داملک مسلم امہ نا کماشی ءِ کروئی ءِ، اودے نن ایٹمی قوت کرین، داسہ اودے زرگزرانی قوت جوڑ کروئی ءِ۔
