انسانیت نا برخلاف ڈوہ کروک آ اسرائیلی ریاست ءِ عدالت نا مون آ سلفنگتو تو جہانی ادارہ تینٹ عدالت نامون آ سلک،  جہانی ادارہ غاتا رپورٹ آک  اسرائیل نا برخلاف بھلو فرد جرم اسےءُ، وزیراعظم شہباز شریف

اسلام آباد۔ 24 اگست (اے پی پی) وزیراعظم محمد شہباز شریف فلسطینی  تا تینا گل زمین آن زوراکی اٹ بے دخلی و چناتا غذائی کاختی نا بابت انسانی امور آ اقوام متحدہ نا ادارہ (اوسی ایچ اے) نا تازہ حوال آ جہانی برادری نا دمدستی گام گیج آتا خواست کرساپارینے کہ انسانیت نا برخلاف ڈوہ کروک آ اسرائیلی ریاست ءِ عدالت نا مون آ سلفنگتو تو جہانی ادارہ تینٹ عدالت نا مون آ سلک، جہانی ادارہ غاتا رپورٹ آک اسرائیل نا برخلاف بھلو فردجرم اسےءُ ۔ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ اقوام متحدہ نا تازہ رپورٹ خوفناک و مظلوم فلسطینی تا نسل کشی نااسرائیلی ڈوہ انا تازہ شاہدی ءِ۔ اقوام متحدہ نا رپورٹ شاہدی تننگ ءِ کہ اسہ دے اس ہم دُن ءُ اف ہراٹی بے گناہ فلسطینی تا دتر ءِ وہیفنگپروئے۔ وزیراعظم پارے کہ اقوام متحدہ نا رپورٹ پاننگ ءِ کہ اسرائیل نا غٹ آن بھلا نشانہ فلسطینی چناک مننگ ءُ، ساف خننگ انگ ءِ کہ اسرائیل فلسطینی تا نسل ءِ چٹفنگ ءِ۔ اوپارےکہ فلسطینی تا نسل کشی نا چرجوئی بناکننگ ءِ 322 دے مسنے، اگست نا تُو اٹی دونیم لکھ فلسطینی تا اوفتا اُراتیان زوراکی اٹ بے دخلی جہانی ادارہ ، جہانی ضمیر و جہانی کانود کن چیلنج اسے۔ وزیراعظم پارے کہ بیرہ اِرادے اٹی 146 فلسطینی تا تینا اُراتیان ناحق بے دخلی آن اسرائیلی ظلم انا رفتار نا کساس ءِ خلنگ مریک، اقوام متحدہ ناادارہ نا رپورٹ  آن پک مریک کہ اسہ کنڈآ مہلک سلہہ غاتے اٹ فلسطینی تا نسل کشی برجاءِ تو ایلو کنڈآ بین ءِ سلہہ نا وڑاٹ کاریم اٹ اتنگ انگ ءِ۔ وزیراعظم پارے کہ قطبی غزہ ٹی بیرہ اسہ درسد و سویلی علاقہ ٹی شش درسد چناتے خور ملنگ ءِ، اسرائیل فضا، ڈغار و سمندرآ ن خاخر و بارود خلسا لس فلسطینی تاکشت وخون ءِ ترند کرینے۔  وزیراعظم پارے کہ انسانیت نا برخلاف ڈوہ کروک آ اسرائیلی ریاست ءِ عدالت اٹ سلفنگتو تو جہانی ادارہ تینٹ عدالت اٹ مریک، جہانی ادارہ غاتا رپورٹ آک اسرائیل نا برخلاف سنگین فردجرم اسے ۔ وزیراعظم پارے کہ انسانیت نا خونی تے سزاتننگے، مظلوم آتا رکھ ءِ کننگے، پاکستان فلسطینی خاص وڑاٹ چناتیکن خور انا فراوانیءِ پین ترند کیک۔