قوم دہشت گردی نا برخلاف جنگ اٹی شہید آتا عظیم قربانی تا کڑز آتے ادا کننگ کپک، بنجائی وزیر داخلہ سید محسن نقوی

اسلام آباد۔ 21 اگست (اے پی پی) بنجائی وزیر داخلہ سید محسن نقوی پارینے کہ قوم دہشت گردی نا برخلاف جنگ اٹی شہید آتا عظیم قربانی تا کڑزآتے ادا کننگ کپک۔ داخیال آتا درشانی ءِ او چارشنبے نادے آ زہمی ءِ دہشت گردی نا یات و اوفتے خراج تحسین پیش کننگ نا جہانی دے آ تینا کلہواٹی کرے۔ اوپارےکہ سلام ہمو غٹ شہید آتے ہرافک تینا اینو ءِ ننا پرامن آخبت کن ندر کریر، آخیریکو دہشت گردءِ چٹفسا شہید آتگا دترنا کڑز آتے ایتنہ۔ وزیرداخلہ پارے کہ دہشت گردی نا برخلاف جنگ اٹی شہید مروک آ ک قوم انا محسنک ءُ،م دہشت گردی نا برخلاف جنگ اٹی پاکستان نا ہرتپہ قربانی تسنے، پاک فوج، پولیس و کانود نافذ کروک آ ادارہ غاتا آفیسر وورناک تینا دتراٹ امن ناآبیاری کرینو۔ اوپارے کہ تاریخ عالم پاکستان نا بے مٹ قربانی تا پین درور تننگ آن قاصرءِ، پاکستان دہشت گردی آن غٹ آن زیات زہمی ملک ءِ۔ وزیرداخلہ پارے کہ دہشت گردی نا برخلاف جنگ اٹی ہزار آ بندغ آک شہید و ٹھپی مسنو۔ حکومت و قوم شہید آتا بہادر خاہوت آتون سلوک ءُ۔ بنجائی وزیرداخلہ پارےکہ شہید آتون اوفتا خاہوت آتے شاندار لوزآتیٹی خراج تحسین پیش کینہ، اینو نن بحیثیت قوم دہشت گردی آن زہمی تتون پورو یکجہتی نا درشانی ءِ کینہ۔ اوپارے کہ پاکستانی قوم بدل مفروک عزم و حوصلہ اٹ دہشت گردی نا عفریت تون مون تسنے، اینو نن دا عزم انا درشانی ءِ کینہ کہ دہشت گردی نا ناسور نا چٹفنگ اسکان آسرات تولپنہ و ننا آخبت زیات پرامن و رکھ مریک۔