اسلام آباد۔ 21 اگست(اے پی پی) صدر مملکت آصف علی زرداری پارینے کہ پاکستان دہشت گردی نا برخلاف اِرا دہائی آن زیات وخت آن برجاجنگ انا بھلو نہاد اس اداکرینے، نن تینا ہزار آ شاری و سیکورٹی و سیکورٹی کارندہ غاتے گوہان، پاکستان نا مسکوہی وزیراعظم گودی بینظیر بھٹو ءِ ہم دہشت گردآک شہید کریر، ملک انا چندی سیاسی و مذہبی راہشونک ہم دہشت گرد آتا دوتیان جون تے آن دوتے سلار، دہشت گردی ملکی زرگزران ءِ ہم ارب آ ڈالر نا نسخان تس، پاکستان مخالف واکدارآک دہشت گردی نا مخ تفی، اودیم مالی کمک و داڑے دہشت گردی نا کارروائی تیکن عسکریت پسند مون تننگ ءُ۔ ایوان صدر نا پریس ونگ آن چارشنبے نادے آ جاری بیان نا رداٹ صدر مملکت داخیال آتا درشانی ءِ زہمی ءِ دہشت گردی نا یات و خراج تحسین نا جہانی دے انا وخت آ تینا کلہو اٹی کرے ہراا ینو (21 اگست )آ اڈتننگ انگ ءِ۔ اوپارے کہ زہمی ءِ دہشت گردی نا یات و اوفتے خراج تحسین پیش کننگ نا جہانی دے انا وخت آنن دہشت گردی نا غٹ زہمی و پاکستانی شاری تے خراج عقیدت پیش کینہ، نن دہشت گرد آتا برخلاف ملکی دفاع ٹی جون تے ندر کروک آ سیکورٹی فورس و کانود نافذ کروک آ ادارہ غاتا بہادر کارندہ غاتے ہم خراج عقیدت پیش کینہ۔ صدر مملکت پارے کہ دادے ننے دہشت گرد زموار آتا دوتے اٹ تینا دوست آتے گوہوک آ غٹ خاہوت آتا دڑد و تکلیف آتا یات ہم ترفک۔ اوپارے کہ داسال نا سرحال’’زہمی ءِ دہشت گردی بطور امن نا علمبردار و معلم ‘‘ داہیت ءِ تالان کیک کہ زندہ بچوک آ بندغ آک امن نا مون آ دننگ و پرتشدد انتہاپسندی نا بھسکار اثرآتا بارواٹی آگاہی ودی کننگ اٹ اہم کڑد ادا کیرہ۔ صدر مملکت پارے کہ ننا قوم داچیلنج آتا مقابلہ ٹی بے مٹ عزم و استقامت نا درشانی ءِ کرے ، پاکستان دنیا نا اسٹ انگا ملک ءِ ہراسرسہبی اٹ دہشت گرد واکدار آتا مون ءِ تورے و اِرا دہائی آن داجنگ اتون تنیا جنگ تننگ ءِ ، ننا کوشست آتے جہانی کہول آ امنا کننگانے و نن جہانی انسدادِ دہشت گردی نا کوشست آتیٹی تگینا کڑد ءِ ادا کننگ کن سنبرینگوک اُن۔ اوپارےکہ اینو ہم ننا بہادر سیکورٹی فورس آک و کانود نافذ کروک آ ادارہ غاک دہشت گرد زموار آتا برخلاف کارروائی تے برجاتخانو و قوم انا امن و سلامتی کن تینا جون تے ندر کننگ ءُ، فوجی آپریشن کون آ حربی گام گیج آتیان چندی دہشت گرد نیٹ ورک آتے سرسہبی اٹ چٹفنگا، داکان بیدس قومی ایکشن پلان، دہشت گردی و انتہاپسندی نا برخلاف پاکستان نا قومی بیانیہ و ایلو راجی و اقتصادی شونداری ڈٹ کون آ غیرحربی گام گیج آتے اٹ دہششت گردی نا برخلاف کمیونٹی نا لائخی ءِ مستحکم کننگانے۔ صدر مملکت آصف علی زرداری پارےکہ اینو نن دہشت گردزموار آتا برخلاف فیصلہ کن کارروائی تے برجاتخنگ نا عزم نا درشانی ءِ کینہ، ننا بنداوی مسخت الس نامخ تفی اٹ دہشت گردی نا پورو چٹفنگ وملک اکن اسہ پرامن آخبت اسے نا دوئی کننگ ءِ، ننا عزم بدل مفروک ءِ، ونن زہمی و اوفتا خاہوت آتا کمک کن سنبرینگوک اُن۔ اوپارے کہ دہشت گردی اسہ جہانی ءُ چیلنج اسے ہرانا چٹفنگ کن جہانی برادری نا اجتماعی کوشست و کمکاری نا گرج ءِ، ننے جہانی کمکاری ءِ سوگو کروئی مریک، انٹیلی جنس شیئرنگ ءِ ودفوئی مریک و انتہاپسندی و دہشت گردی ءِ تہو تروک آبنداوی سوب آتا سدباب ءِ کروئی مریک۔ صدر مملکت پارےکہ کنے یقین ءِکہ نن غٹ اواری اٹ کاریم کرسا غٹ اکن اسہ رکھ و پرامن دنیااس جوڑ کننگ کینہ۔
