فلسطین و غزہ نا حالیت آتیا جہانی ادارہ غاتا ضمیر بایدے بش مرے، آئی پی پیز نا کیپسٹی پیمنٹ تون اوار بجلی نا بشخ انا ویل آتا ایسری کن کوشست کننگ اُن ، الس ءِ ریلیف تننگ کن ہرممکن گام گیج کننگ اُن، وزیراعظم شہباز شریف

اسلام آباد ۔ 02 اگست (اے پی پی) وزیراعظم محمد شہبا زشریف اسماعیل ہنیہ نا خون نا ترندی اٹ مذمت ءِ کرسا پارینے کہ جہانی ادارہ غاتا فلسطین و غزہ نا حالیت آتیا ضمیر بایدے بش مرے۔ آئی پی پیز نا کیپسٹی پیمنٹ تون اوار بجلی نا بشخ انا ویل آتا ایسری کن کوشست کننگ اُن، الس ءِ ریلیف تننگ کن ہرممکن گام گیج کننگ انگ ءِ۔ داخیال آتا درشانی ءِ او جمعہ نادے آ بنجائی کابینہ ٹی دیوان نا بناآ تران کرساکرے۔ وزیراعظم پارے کہ اسماعیل ہنیہ  ءِ سفاکی اٹ ایران اٹ شہید کننگا۔ پاکستان، ترکیہ ، ملائیشیا تون اوار ایلو ملک آک  دانا مذمت ءِ کرینو۔ سیوتی جماعت آک ہم اونا مذمت ءِ کرینو۔ جہانی ادارہ غاتا اینو ضمیر بایدے بش مرے۔ غزہ و فلسطین اٹی بدترین بھسکاری مننگ اٹی ءِ۔ اسہ پڈپُر ءُ نیاڑی اسے بیدادی اٹ شہید کننگا۔ نماز جمعہ غان پد اسماعیل ہنیہ نا غائبانہ جنازہ ءِ خواننگک ، ای و غٹ وزیر آک ہم غائبانہ جنازہ ٹی بشخ ہلینہ۔ وزیراعظم پارے کہ بجلی تنکی نا ایسری کن دے و نن کوشست برجاءِ۔ ننا سیاست السی خذمت ءِ۔ مسکوہی وزیراعظم نواز شریف نا دور اٹی 20،20 گھنٹہ نا لوڈشیڈنگ ءِ چٹفین۔ ای سی پیک نا رداٹ 2015 ٹی پاکستان اٹ زرکاری نا عندیہ تسٹ۔ سی پیک نا رداٹ بجلی نا ڈٹ خلنگا۔ 4 ایل این جی پاورپلانٹ خلنگا۔ 5 ہزار میگاواٹ بجلی ودی کننگا۔ دادورا ٹی غٹ آن اڑزان پلانٹ خلنگا۔ نن ملک ءِ مون ترو ک داچیلنج ءِ ایسر کننگ کن مخلصانہ کوشست کننگ اُن۔ نن تدوک آمنہ تُو اٹی دابابت کیہی گام گیج کرینن۔ اڑزان بجلی ننا وننا سیوتی حکومت نا ایجنڈا ءِ۔ داڑآ سیاست السی توہین آنبار ءِ۔ دامچ آ قوم و غریب آتا خواست ءِ کہ بجلی نا ویل ءِ ایسر کننگے۔ داپیچیدہ ءُ باندات اسے۔ اوپارے کہ توانائی نا بشخ و ایف بی آر ءِ فعا ل کننگ و کرپشن آن پاک کننگ اٹ سرسہب مسن تو کشتی منجدھار آن پیش تمک۔ الس نا مشکل آتا پورو درک ءِ۔ اسہ خاص ءُ جماعت اسے نا خیبرپختونخواٹی 10 سال آن حکومت ءِ، او ہموڑے اخس ڈٹ خلک؟ و پن بجلی ڈٹ آتیا اخس زرکاری کرے؟ ہیت کننگ آسان و عمل کننگ مشکل ءِ۔ اوپارے کہ بلوچستان اٹی ٹیوب ویل آتیکن بجلی نا مد اٹی ار ب آ روپئی زیان مسکہ۔ داسہ بلوچستان کن شمسی توانائی نا 70 ارب روپئی نا ڈٹ بناکننگ انگ ءِ ہراٹی 55 ارب روپئی بنجا و ایلوفتے صوبہ ایتک۔ بلوچستان نا الس کن دھرنہ تروک آک ہم توار بڑزکرینو۔ داسیاست برائے سیاست ءِ۔ اوپارے کہ بجلی دُزی نا توننگ کن نمام گام گیج کرینن۔ نگران حکومت ہم دا بابت گچین گام گیج کریسس۔ داباندات آ سپہ سالار نا عزم پیدوار ءِ۔ نن اجتماعی کوشست بایدے کین۔ غٹ ادارہ غاک تینا آئینی دنگ اٹ رہینگسا کاریم کیر۔ صوبہ پنجاب و صوبہ سندھ بجلی دُزی نا توننگ اٹ پبی تفنگ ءُ۔ ملک ءِ مون تروک ویل آتا اسٹ انگا ایسر ہول آف دی گورنمنٹ اپروچ ءِ ۔ خراج نیٹ اٹ ودکی المی ءِ ولے خراج ادا کروک آتیا پین خراج خلنگ جوان اف۔ تنخواہ دار تپہ غا خراج اٹی ودکی کننگانے اونا احساس ارے۔ وزیراعظم پارے کہ 200 یونٹ بجلی کاریم اٹ اتوک آتے رعایت تننگا۔ 500 یونٹ بجلی کاریم اٹ اتوک آتے ریلیف فراوان کننگ کن گام گیج آتیا سجفنگ انگ ءِ۔ بجلی بل آتا ادائیگی ٹی آسراتی کن 50 ارب روپئی فراوان کننگا۔ بجلی نا بل آتا ادائیگی کن تاریخ آتیٹی 10 دے انا ریلیف تننگانے۔ بجٹ اٹی صنعت آتیکن بجلی نا نہاد اٹی 8 ءُ نیم روپئی فی یونٹ کمتی کننگا۔ ’’ابسلوٹلی ناٹ‘‘ پاروک آتا گام گیج آن سفارتی تعلقداری تے نسخان رسینگا۔ بجلی نا نہاد آتیٹی کمتی آن برآمد آتیا خڑچ آتیٹی کمتی بریک۔ حکومتی آئی پی پیز آتیا ترندی اٹ کاریم کننگ اُن، زوت اوفتا باندات ایسر مریک۔ گڑاس نجی آئی پی پیز تینا وام تے تسنو و گڑاس داوام تے تروئی ءِ۔ داباندات آ چین ءِ ری پروفائلنگ کن چھٹی اس نوشتہ کرینن۔ چین نا صدر ءِ اوڑدہی ٹی درآمدی ایندھن آ بجلی نا پیدوار نا گدریفنگ نا بابت معلومدار کرین۔ وزیراعظم پارے کہ الس نا ویل آتیان پورو وڑاٹ معلومدار اُن و اوفتا ایسری کن کوشست کننگ اُن۔ ننے گونڈ مدی و مریس مدی ڈٹ آتیا کاریم کروئی مریک۔