صہیونی ریاست انسانیت نا برخلاف ڈوہ تا ہر حدآن گدرینگانے، کودک فلسطینی تا دمدستی وڑاٹ انسانی ہمدردی نا بنداو آ امداد اسکان رسینگ ءِ پک کننگے، وزیراعظم

اسلام آباد۔ 02 اگست (اے پی پی) وزیراعظم محمد شہباز شریف پارینے کہ فلسطین اٹ صہیونی ریاست انسانیت نابرخلاف ڈوہ تا ہرحدآن گدرینگانے، نن خواست کینہ کہ کودک فلسطینی تا دمدستی وڑاٹ انسانی ہمدردی نابنداو آامداد اسکان رسینگ ءِ پک کننگے، اوآئی سی نا پلیٹ فارم ءِ پین فعال کننگے، جہانی عدالت انصاف نا فیصلہ، اقوام متحدہ و سلامتی کونسل نا قرارداد، جنیوا کنونشن و انسانی حق انا تنظیم تا اعلامیہ، مچ آ دنیا نا کنڈآن جنگ بندی نا خواست، کل گڑاک بارود نا گواچی مسنو، دنیا غا بے حسی و بارود نا راج ءِ، دنیا نا امن و شونداری ءِ داگام گیج آتیان خطرہ ءِ۔ جہانی ادارہ غاک و دنیا دانا نوٹس ءِ ہلیر۔ جمعہ نادے آ قومی اسمبلی ٹی تران کرسا وزیراعظم محمد شہباز شریف پارے کہ اسہ ہندن ءُ وخت ہراتم مچ آپاکستان و عالم اسلام تہران اٹ اسماعیل ہنیہ نا شہیدی آ اشک بار ءُ، داستاکڑزک کہ دا شرفمند آ  ایوان امنائی قرارداد اس ایسونے، داڑآ حکمران سیوت اٹ اوار غٹ جماعت و اپوزیشن غٹ انا منت وار اُن ۔ اوپارے کہ داایوان نا پبی توار دنیا ٹی تالان مریک و داڑآن دشمنان پاکستان نا است سرک و پاکستان نا سنگت آتے سوگوی ملک۔ وزیراعظم پارے کہ تدوک آ دے دا بابت سیوتی جماعت آتا دیوان اس ہم اڈتننگا ہراٹی اوفک پبی راہشونی تسر۔ اوپارے کہ نن بہادر فلسطینی تتون پبی یکجہتی نا درشانی ءِ کینہ  ہراتاریخ نابدترین ظلم ، جور و سفاکی تون مون تننگ اٹی ءُ، فلسطین خون نا جاگہ اس جوڑ مسنے، صہیونی ریاست 9 تُو آن کشت وخون کننگ ءِ و 40 ہزار آن زیات چنا، زالبول آتون اوار فلسطینی تے شہید کننگانے، ہموجاگہ نا بستیک قبرستان جوڑ مسنوہراڑے چناتا گوازی کننگ نا توار و بشخندہ غاک تالان ئسر ہموڑے کوک و واتوڑ ءِ، ہرکنڈآ تالان دترانسانیت نا روح ءِ سرفسا انصاف طلب کننگ ءِ کہ دا ظلم چوخت چٹک۔ اوپارے کہ دا فلسطینی مسڑ نا صدا ننا خف تیٹی پِننگ ءِ ہرادا موقف اختیار کریسس کہ ننے مسلمان مننگ، اسہ خدا، اسہ رسول و اسہ قرآن اسے مننگ نا سوب آن خلنگ انگ ءِ۔ وزیراعظم پارے کہ دا سوج داناانصافی نا سوب آن ءِ کہ  اسرائیلی بربریت جہانی ادارہ غاتا قرارداد و جہانی کانود آعمل مفننگ ءِ، مچ آدنیا نا کروڑآ مسلمان ومذہب آن تعلق تخوک آ ارب آ انسان ہم اینو ہندا سوج ءِ کننگ ءُ۔ داخاص ءُ مذہب یا عقیدہ سے نا سوج اف بلکن انسانیت نا سوج ءِ، ، داکانود و عدل نا اسہ وڑ اطلاق نا سوج ءِ، داہمو چنانا سوجءِ ہرادنیا ٹی خن تے ملنگ تون بے شولنگا ، دا ہمو لمہ نا سوج ءِ ہرا اینوشہیدی نا جام ءِ کنگنو و اونا شہیدی آن پد اونا چناودی مس۔ اوپارے کہ داہمو اصول و قرارداد آتیا عملدرآمد نا سوج ءِ ہراڑکن اقوام متحدہ، سلامتی کونسل و انسانی حق انا تنظیمک جوڑ مسوسر۔ وزیراعظم پارے کہ اصل سوج داانصاف نا ءِ ہرانا روشنا اصول آتیا اوفتا چارٹر تیار مس، دنیا ءِ انصاف نا وت اس جوڑ کننگ نا مستائی تننگا، اینو دا انسان تا دتر توار توار کرسا انصاف طلب کننگ ءِ۔ اوپارے کہ اینو جہانی ضمیر تینٹ انصاف نا مون آ ڈوہ آنبار سلوک ءِ، اونا اسہ دے اس ورندی ءِ تو تروئی مریک، ہراتم پاش آن پاش جہانی ضابطہ غاتے لتاڑنگے، ہراتم بے گناہ انسان تا بستی خاک و دتر اٹ بے شولنگے، ہراتم اقوام متحدہ و میڈیا نا دفتر، ہسپتال  و اسکول درندگی نا شست مریر تو داوڑنا سوج تو بش مریک، صبر انا پیمانہ تو لبریز مریک، فلسطین اٹ صہیونی ریاست انسانیت نا برخلاف ڈوہ انا ہرحد آن گدرینگانے، جہانی عدالت انصاف نا فیصلہ، اقوام متحدہ و سلامتی کونسل نا قرارداد، جنیوا کنونشن و انسانی حق انا تنظیم تا اعلامیہ، مچ آ دنیا نا کنڈآن جنگ بندی نا خواست، کل گڑاک بارود نا گواچی مسنو،اگہ انصاف نا خواست آتے پورو کننگتو تو بے گناہ انسان تا کشت وخون نا مرتکب ریاست ءِ انصاف نا مون آ اسلفنگتو تو السی غیض و غضب نا لاوا ءِ توننگ ولدا کس اسے نا وس انا ہیت اس مفک، مچ آ دنیا نا امن و شونداری داٹی بھسم مننگ نا خطرہ ساڑی ءِ۔ اوپارے کہ کپوت آنبار خن تےتفنگ اٹ کاریم چلینگپک، 31 جولائی آاسماعیل ہنیہ ءِ ہمووخت آ شہید کننگا ہراتم او تہران اٹی ایران نا پوسکن گچین مروک آ صدر نا سوغندی دود اٹی بشخ ہلنگ کن ساڑی ئس، داامن نا کوشست آتیکن بھاز بھلو دھچکہ اسے۔ اوپارے کہ پاکستان نا حکومت و الس نا کنڈآن داخون نا ترندی اٹ مذمت ءِ کرسا شہید انا خاہوت و فلسطینی الس تون یکجہتی نا درشانی ءِ کینہ، پاکستان عدالت آن ایڑتر و علاقائی دنگ انا خلاف ورزی ءِ کرسا کروک آ خون و ہروڑنا دہشت گردی نا پبی مذمت ءِ کیک ، داکارروائی ٹی ہرکس کہ اوار ءِ اودے کانود نا مون آ سلفنگے، صہیونی ریاست دا ڈوہ تیٹی اوار ءِ، دااسرائیل نا سفاکانہ کارروائی تا عکاسی ءِکیک۔ وزیراعظم پارے کہ داسال 10 اپریل آ اسماعیل ہنیہ نا 3 مار و 4 نواسہ نواسی تے شہید کننگا ، دنیا نا تاریخ اٹی داکان زیات ظلم و زیاتی نا داستان بِننگ و ہِننگ اٹ بتنے وخت اس کہ داکان زیات قربانی تا پین ہچءُ داستان اس مننگ کپک، تاریخ دا قربانی تے روشنا لوز آتیٹی نوشتہ کیک و داقربانیک زیان مفسہ۔  اوپارے کہ اینو جہانی ضمیر تینٹ انصاف نا مون آ ڈوہ آنبار سلوک ءِ، اونا اسہ دے اس ورندی ءِ تو تروئی مریک، ہراتم پاش آن پاش جہانی ضابطہ غاتے لتاڑنگے، ہراتم بے گناہ انسان تا بستی خاک و دتر اٹ بے شولنگے، ہراتم اقوام متحدہ و میڈیا نا دفتر، ہسپتال  و اسکول درندگی نا شست مریر تو داوڑنا سوج تو بش مریک، صبر انا پیمانہ تو لبریز مریک، فلسطین اٹ صہیونی ریاست انسانیت نا برخلاف ڈوہ انا ہرحد آن گدرینگانے۔ وزیراعظم پارے کہ نن خواست کینہ کہ کودک فلسطینی تا دمدستی وڑاٹ انسانی ہمدردی نا بنداو آ امداد اسکان رسینگ ءِ پک کننگے ، اوآئی سی نا پلیٹ فارم ءِ پین فعال کننگے۔ وزیراعظم پارےکہ جمعہ نا نماز آن پد مچ آملک اٹی اسماعیل ہنیہ نا غائبانہ نماز ءِ جنازہ ءِ خواننگ نا خواست کننگانے، فلسطینی تتون یکجہتی نا درشانی کننگ نا ایوان امنائی قرارداد اس ہم منظور کرینے۔ وزیراعظم پارے کہ پاکستان نا سفارتی پالیسی بابائے قوم قائد اعظم محمد علی جناح نا سوگو موقف نا بنداو آاینو ہم جاری و ساری ءِ۔