اسلام آباد۔ 10 ستمبر (اے پی پی) جہانی برادری آن پاکستان ءِ 2022 نا نوکاپ آن مروک آ نسخان تا مد اٹی برجامالی سال اٹی 75 کروڑ 93 لکھ 60 ہزار ڈالر ملک۔ پلاننگ کمیشن نا کنڈآن جاری کروک حساب وکتاب نا رداٹ برجامالی سال اٹی ورلڈ بینک آن برجامالی سال اٹی 287ملین ڈالر، ایشین ڈویلپمنٹ بینک آن 249.18 ملین ڈالر، اے آئی آئی بی اینڈ چائنہ آن 6.26ملین ڈالر، آئی ایس ڈی بی آن 111.07ملین ڈالر، پیرس کلب آن 73.78ملین ڈالر، یوایس اے/یو ایس ایڈ آن 32 ملین ڈالر ملک۔ پلاننگ کمیشن نا رداٹ 2022 نا نوکاپ اٹی پاکستان ءِ جم وڑاٹ 30 ارب ڈالر نا نسخان مس۔ بحالی نا کساس 16.2 ارب ڈالر ئس وخت اس کہ دا بابت جہانی برادری نا کنڈآن ’’کروک آ قول‘‘ آتا مالیت 10.9 ارب ڈالر ءِ، ہنداوڑ داسہ ہم 17.1 ارب نا کمتی مون تروک ءِ۔ پوسٹ ڈیزاسٹر نیڈز اسسمنٹ (پی ڈی این اے) کساس ءِ خلکنےکہ جم نسخان 14.98بلین ڈالر آن گدرینگانے وخت اس کہ زرگزرانی نسخان 15.2 بلین ڈالر اسکان سرمسنو۔ کساس اٹی غذائی بے رکھی ٹی ہم نمان ودکی نا پیش گوئی کننگانے و زہمی بندغ آتا کچ 70 لکھ آن ودسا 14.6 ملین مننگ نا گمان ءِ۔ داکان بیدس، 2 ملین آن زیات ہاؤسنگ یونٹ آتے نسخان رسینگا۔ ہرافتیان 780،000پورو وڑاٹ بھس مس و 1.2 ملین آن زیات ءِ جزوی نسخان رسینگا ۔ 2022 نا نوکاپ نا بابت وزارت ڈٹ بندی حکومت پاکستان نا اسٹریٹجک پالیسی اس تیار کرے، ہرادے پائیدار تعمیر، زہمی بندغ و علاقہ غاتا بحالی و تعمیر نو فریم ورک (4آرایف) نا پن اٹ چاہنگک ۔ دا فریم ورک ملک اٹی نوکاپ آن زہمی علاقہ غاتا بحالی، ملکیت، انفراسٹرکچر، سڑک و بنداوی پنجر نا پوسکن تفنگ کوشست آتا راہشونی کن ڈیزین کننگانے۔
