اسلام آباد۔ 03 ستمبر (اے پی پی) قومی اسمبلی ءِ پاننگانے کہ گرین پاکستان انیشی ایٹیو نا رداٹ کارپوریٹ فارمنگ کن داتم اسکان اِرا صوبہ پنجاب وسندھ معاہدہ کرینو، جم وڑاٹ 8 لکھ 12 ہزار ایکڑ ڈغار نا منتقلی مسنے، ڈٹ اکن دِیر صوبہ غاتا بشخ آن تننگک۔ سے شنبے نادے آ قومی اسمبلی ٹی کارپوریٹ فارمنگ کن تروک آ4.8ملین ایکڑ ڈغار نا بابت سید نوید قمر و ایلوفتا چکاری نوٹس آ بنجائی وزیر آبی وسیلہ و پیٹرولیم مصدق ملک پارے کہ گرین پاکستان انیشی ایٹیو نا رداٹ بنجر علاقہ غاتےزیرکاشت اتنگ انگ ءِ، داتم اسکان بیرہ 8 لکھ 12 ہزار ایکڑ ٹرانسفر مسنے، اوپارے کہ ڈٹ انا رداٹ کارپوریٹ کٹیا غان 40 درسد صوبہ، 40 درسد زرکار و 20 درسد پٹ وپول و شونداری آ خڑچ مریک۔ ڈٹ انا رداٹ گرین کوآپریٹ انیشی ایٹیو نا پن اٹ ایس ای سی پی ٹی کمپنی رجسٹرڈ کننگانے، اخس دِیر درکار مریک او صوبہ غاتا بشخ آن تننگک۔ اوپارے کہ ڈٹ انا رداٹ چولستان جوانا اسکیم جوڑ کننگانے ہرا 296 کلومیٹر مرغن مریک۔ 176 کلومیٹر نا پن چولستان و 120 کلومیٹرنرورٹ کینال ءِ، داڑآن چار ءُ نیم لکھ ایکڑ ڈغار آباد مریک۔ ارسا پنجاب تون مذاکرات کرینے و جواکن دِیر پنجاب نا بشخ آن تننگک۔ چولستان کینال شش تُوئی کینال ءِ، کینال ءِ 4 تُو صوبہ نا بشخ آن و اِرا تُو نوکاپ نا دِیر تننگک۔سید نوید قمر نا سوج آ اوپارے کہ ہشت می ترمیم آن پد بنجاصوبہ غاتے دیر انا کاریم اٹ اتنگ نا بابت پاننگ کپک۔ ہرصوبہ تینا فیصلہ ءِ تینٹ کروئی مریک۔ داوخت آ بیرہ پنجاب و سندھ کارپوریٹ فارمنگ نا بابت معاہدہ کرینو، دیر انا کاریم اٹ اتنگ نا بابت غٹ امور آک پیدوار ءُ ۔ اوپارے کہ کارپوریٹ فارمنگ نا ذریعہ نئے بیرہ پیدوار اٹی ودکی مریک بلکن بزغر و کشارگرآتا حالیت زاراٹی ہم گچینی بریک۔ پاکستان اٹ ہمسایہ ملک آتا مقابلہ ٹی فی ایکڑ پیدوار کم ءِ۔ اسکیم نا رداٹ دیر انا گچین کاریم اٹ اتنگ ءِ پک کننگک۔ ڈٹ انا رداٹ کٹیانا 20 درسد پٹ وپول آ کاریم اٹ اتنگک۔ اوپارے کہ ٹیلی میٹری نا مچ آ نظام شین تننگانے و داڑآ عمل درآمد ہم زوت مریک۔ میر غلام علی تالپور نا سوج آ اوپارے کہ پیدوار ءِودفنگ کن روایتی کشاری گری تون اوار اوار زرکاری و پوسکن آ ذریعہ نا کاریم اٹ اتنگ المی ءِ۔ ننا وزارت بیرہ دیر انا کاریم اٹ اتنگ نا چاروکی ءِکیک۔ اوپارے کہ داڈٹ انارداٹ بیرہ کرکی و بنجر ڈغار تے آباد کننگ انگ ءِ۔ سید حسین طارق نا سوج آ اوپارے کہ مچ آ ڈٹ انا مسخت پیدواری کشت وکشار ءِ مون آدننگ ءِ، داڑآن دیر انا جوان کاریم اٹ اتنگ ءِ پک کننگک۔ اوپارے کہ ہراصوبہ ءِ اعتراض ارے او معاہدہ ءِ چٹفسا ڈغار ءِ پدی ہلنگ کیک۔ سید خورشید شاہ پارے کہ داباندات بھاز اہم ءِ، مستین اٹ دیرانا بشخنگ نا بابت معاہدہ مسنے، نن گڑتی تیان پد ہم معاہدہ غاتے امنا کرینن، داہندن ءُ باندات اسے ہراڑآن ویل ودی مننگ کیک، کوٹری آن شیف بیرہ نوکاپ نا دیر ہِننگ ءِ ہڑدے ئی دیراف ای۔ اوپارےکہ داوخت ریزرودِیرانا کچ 1400 ملین ایکڑفٹءِ ، 48 ملین ایکڑ کن اخس دِیردرکار ءِ اونا کساس ءِ بایدے خلنگے۔ بنجائی وزیر مصدق ملک پارے کہ بینظیر بھٹو نا شہیدی آن پد پی پی پی پاکستان کھپے نا نعرہ ءِ خلکوسس و ننے یقین ءِ کہ سندھ اٹی داسہ وخت اس ہم پاکستان نا برخلاف نعرہ لگپک، پیپلزپارٹی نا جہد و قربانی تے نن گوجالنگ کپنہ۔
