اسلام آباد۔ 10 ستمبر (اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ کشت وکشار و انفارمیشن ٹیکنالوجی، زرگزران اٹی مخ انا ملی و ملک انا زرگزرانی شونداری نا حقی وت ءِ۔ اوداہیت ءِ یوایس کموڈٹی فیوچر ٹریڈنگ کمیشن (سی ایف ٹی سی) نا دفترجہانی امور نا ڈپٹی ڈائریکٹر کیون پکولی تون اوڑدہی ٹی پارے۔ چیئرمین ایس ای سی پی عاکف سعید، پاکستان اٹ امریکی سفارت خانہ نا کمامدارو فنانس ڈویژن نا سینئر کمامدارآک ہم داوخت آ ساڑی ئسر۔ اوڑدہی ٹی کشاری اجناس نا منڈی نا کڑد و پاکستان اٹ اجناس نا آخبت نا مارکیٹ نا شونداری ، ضابطہ و چاروکی نا چرجوئی ٹی کاریم نا کچ ءِ ودفنگ نا ہیلکاری سیشن تا برجاسیریز نا لی سیکورٹیز اینڈ ایکسچینج کمیشن آف پاکستان و سی ایف ٹی سی نا نیام اٹ کمکاری آ گپ وتران کننگا۔ اوپارے کہ ہراڑے مالی سال 2024 اٹی پاکستان نا زرگزران اٹی 2.38 درسد نا نمو مس ہموڑے کشت وکشار اقتصادی شونداری نا اسہ اہم محرک اسے نا وڑاٹ مون آ بسنے و بھلا فصل آتا پیدوار اٹی 6.25 درسد نا نمان ودکی مس۔ اوپارےکہ پاکستان اٹی کشت وکشار و آئی ٹی ہڑتوم آ بشخ آتا سیبو بھلو حداسکان ملکی عوامل آ کارفرماءِ ، دا بشخ آتیٹی دراخ جوڑ و آخبتی شونداری قومی زرگزران کن اہمیت تخک۔ ہڑتوم آبشخ آتا برآمدی لائخی آن پبی فائدہ ہرفنگ المی ءِ۔
