ڈنمارک نا کنڈآن  معدنیات نا بشخ اٹی ہڑتوم آ کنڈآتا کاروباری سرجز آتیان ملکی زرگزران سوگو مریک، جام کمال خان

اسلام آباد۔ 02 ستمبر (اے پی پی) بنجائی وزیر واپار جام کمال خان پارینے کہ ڈنمارک حکومت نا کنڈآن معدنیات نا بشخ اٹی کمکاری و ہڑتوم آکنڈآتا کاروباری سرجز آتیان ملکی زرگزران سوگو مریک۔داخیال آتا درشانی ءِ او ڈنمارک نا سفیر جیکب لینولف نا کماشی ٹی میکو کیٹو گروپ نا سی ای او فل سمڈتھ تون دوشنبے نادے آ اوڑدہی ٹی کرے۔ اوڑدہی ٹی بنجائی وزیر ، عبدالعلیم خان، مصدق ملک و محمد اورنگزیب ئسک ہم ساڑی ئسر۔ داوخت آ وزیر واپار پارےکہ ڈنمارک پاکستان نا بھاز اہم کاروباری شریدار ءِ ونن دا شریداری ءِ مون آ ہنسا ہُننگ خوانہ۔ اوڑدہی ٹی ڈنمارک نا سفیر پارے کہ ڈنمارک تدوک آ 30 سا ل آن پاکستان اٹی اسٹیٹ آف دی آرٹ ڈٹ آتیٹی لگوک ءِو ہڑتوم آملک آتا نیام اٹ سوگو واپاری تعلقداری ءِ۔ اوڑدہی ٹی بنجائی وزیرآک پاریر کہ پاکستان اٹ معدنی  وسیلہ غاتا گیشتر کوڑی ساڑی ءِ و بھلو زرکاری اس مننگ کیک۔ بنجائی وزیر پیٹرولیم مصدق ملک پارے کہ پاکستان معدنیات نا بشخ اٹی درملکی زرکاری نا ستاءِ کیک، پاکستان آخبت اٹ ڈنمارک تون بزنس نا مون آ دننگ و پین کمکاری نا خواہندار ءِ۔ بنجائی وزیر نجکاری و زرکاری عبدالعلیم خان پارے کہ ڈنمارک تون زرکاری بھاز است بڈءِ۔ مثبت نتیجہ مون آ بریک، حکومت نجی بشخ انا کمکاری اٹ کاروباری سرجز آتا مون آ دننگ اٹ است خواہی تخک۔ بنجائی وزیر خزانہ محمد اورنگزیب تینا محکمہ نا کنڈآن ہرممکن کمکاری نا باوری کرفے۔ اوپارے کہ واپار ءِ مون تروک غٹ ویل آتے اولیتی بنداو تیا ایسر کننگک۔