ڈنمارک نا بھلا بزنس گروپ نا پیٹرولیم، خزانہ، مواصلات وواپار نا بنجائی وزیر آتون اوڑدہی، پاکستانی معدنی صنعت اٹ بھلو زرکاری اسے نا عزم انا درشان

اسلام آباد۔ 02 ستمبر (اے پی پی) ڈنمارک نا بھلا بزنس گروپ پاکستان اٹ معدنی صنعت اٹ بھلو زرکاری اسے ٹی بھاز است خواہی نا درشانی ءِکرینے۔ پیٹرولیم ڈویژن آن جاری اعلامیہ نا رداٹ ڈنمارک نا سفیر جیکب لینولف نا کماشی ٹی پنی آ ڈینش مائننگ کمپنی ایف ایل سمڈتھ نا سی ای او میکو کیٹو بنجائی وزیر ڈاکٹر مصدق ملک، محمد اورنگزیب، عبدالعلیم خان و جام کمال تون اوڑدہی کرے۔ بنجائی وزیر آک پاریر کہ پاکستان اٹ معدنی وسیلہ غاتا گیشتر کوڑی ساڑی ءِ و بھلو زرکاری اس مننگ کیک۔ وزیرپیٹرولیم مصدق ملک پارےکہ پاکستان معدنیات نا بشخ اٹی درملکی زرکاری نا ستاءِ کیک، ٹیکنالوجی نا ہل و تس و طالب علم آتیکن ریسرچ و ٹریننگ نا وارخواہی تیاہم کاریم کینہ۔وزیرخزانہ محمد اورنگزیب تینا محکمہ نا کنڈآن ہرممکن  کمکاری نا باوری کرفے۔ بنجائی وزیرمواصلات عبدالعلیم خان پارے کہ ڈنمارک آن زرکاری بھاز است بڈ ءِ، مثبت نتیجہ مون آ بریک، حکومت نجی بشخ انا کمک اٹ کاروباری سرجز آتگا مون آ دننگ اٹ است خواہی تخک۔ وزیرواپار جام کمال پارینے کہ ڈنمارک نا معدنیات نا بشخ اٹی کمکاری و ہڑتوم آ کنڈآتا کاروباری سرجزآتیان ملکی زرگزران سوگو مریک۔ ڈنمارک پاکستان نا بھاز اہم کاروباری شریدار ءِ نن دا کورڈیل ریلیشن شپ ءِ مون آ ہنسا ہُننگ خوانہ۔ داوخت آ ڈنمارک نا سفیر پارےکہ اونا ملک 30 سال آن پاکستان اٹ اسٹیٹ آف دی آرٹ ڈٹ آتیٹی لگوک ءِ، مائننگ انڈسٹری ٹی عمل نا قابل سلاہ و فائدہ مند ڈٹ آتون مون آ دینہ۔