اسلام آباد۔ 07 ستمبر (اے پی پی) پاکستان مسلم لیگ (ن) نا راہشون طلال چوہدری پارینے کہ پی ٹی آئی نا ہرراہشون بھلو ہیت کننگ ءِ، داشوبازی کننگ خوارہ، جلسہ ضرور کیر ولے کانود نا دنگ اٹ رہینگسا ، انتظامیہ پرامن جلسہ کن پورو کمک فراوان کیک، مستین اٹ اسلام آباد نا امن ءِ خراب کننگ نا کوشست کننگا، پی ٹی آئی والاک اسہ وخت اسے آن جلسہ جلسہ نا شئیر ءِ خلنگ ءُ، پی ٹی آئی چندی گروپ آتیٹی بشخنگانے، ایلوفتیا سوج ہرفنگ نا جاگہ غا خیبرپختونخوا (کے پی کے) ٹی 13 سال انا حکومت نا کارکڑد ہم الس ءِ پاننگے، خیبرپختونخوا نا الس نا پیسہ غاتے اٹ کرین اتسا اسلام آباد آ بننگ نا موکل تفننگک۔ داخیال آتا درشانی ءِ راہشون مسلم لیگ (ن) طلال چوہدری ہفتہ نادے آ سیاسی امور آ گپ وتران کرساکرے۔ اوپارے کہ اینو پگہ ولدا جلسہ نا شور ءِ و وار وار جلسہ جلسہ نا توار ءِ بِننگ اُن، پی ٹی آئی ٹی چندی گروپ چندی دھڑآک ءُ، چندیک ہندن ءُ ہرااوڑآ کوزہ و چوہدراہٹ قائم کننگ خوارہ۔ طلال چوہدری پارے کہ دے و نن رنگ برنگی بولی پاننگک و بھلو ہیت کننگک و ولدا کف آنبار تولرہ، اوفتا مسخت بیرہ تینے نشان تننگ، رنگ بازی و شوبازی ءِ۔ اوپارے کہ اگہ جلسہ کروئی ءِ تو سد بسم اللہ ، بے شک ہڑدے جلسہ کیر ولے آئین و کانود نا دنگ اٹ رہینگسا کیر۔اوپارے کہ اسلام آباد اٹی مہالو جلسہ اڈتننگ نا کانود ساڑی الوکہ، داسہ اسمبلی اسہ پوسکن ءُ کانود اس پاس کرینے، اونا رداٹ پرامن جلسہ کننگ ہراسٹ نا حق ءِ ، پرامن جلسہ نا بابت انتظامیہ آسراتی فراوان کیک، طلال چوہدری مستی پارے کہ پرامن جلسہ نا اڈتننگ کن پورو کمک فراوان کننگک۔ ولے شڑت دادے کہ او کانود و آئین نا رداٹ مرے، ہراپاس کننگانے و اگہ کس اس کانود و آئین نا خلاف ورزی نا مرتکب مریک تو کانود نا رداٹ اونا سزاہم ارے۔ اوپارے کہ جلسہ ضرور کیر ولے بے چیٹی آخا، جلسہ کیر ولے جلسہ نا پن آ واروار جلسہ پارسا مخلوق ءِ داپاپس کہ اوفتے انتظامیہ جلسہ کننگ کن ہلپننگ ءِ۔ انتظامیہ و حکومت بالکل کلیئر ءِ کہ کانود نار داٹ نم اسٹ آخا سد جلسہ کبو، ولے کانود آن اینک تینا من مانی اٹ ہراوڑ مہالو اسلام آباد ءِ خاخر لگفسا کرینو، دھرنہ ترسا کرینو، ہموڑے برسا اسہ شور اس برپاکرسا کرینو و اسلام آباد نا کاروبارءِ بند کننگ نا کوشست کرسا کرینو او داسہ مفک۔
