اسلام آباد۔ 07 ستمبر (اے پی پی) بنجائی وزیر مواصلات ، نجکاری و زرکاری بورڈ عبدالعلیم خان پارینے کہ پاکستان پوسٹ نا ساڑی آ نسخان ناقابل قبول،پوسکن آ بزنس ماڈل آ عملدرآمد کروئی مریک، پاکستان پوسٹ نادرا و ایلو ادارہ غاتون تین پہ تینی شریداری اٹ تینا ریونیو ٹی ودکی کے، پاکستان پوسٹ ءِساڑی آ قول انا خواست آتا رداٹ پوسکن ءُ اصلاحات اتوئی مریک۔ وزارت مواصلات نا کنڈآن ہفتہ نادے آجاری اعلامیہ نا رداٹ پاکستان پوسٹ نا ادارہ نا ساڑی آکارکڑد ءِ گچین کننگ کن ہلہلہ ئی بنداو تیا پوسکن ءُ گام گیج کننگ نا فیصلہ کننگانے۔ بنجائی وزیر مواصلات ، نجکاری و زرکاری بورڈ عبدالعلیم خان پاکستان پوسٹ ءِ گچینی نا پوسکن ءُ ٹاسک اس تسنے۔ بنجائی وزیر عبدالعلیم خان پارے کہ پاکستان پوسٹ نا ساڑی آ نسخان ناقابل قبول، پوسکن آ بزنس ماڈل آ عملدرآمد کروئی مریک، پاکستان پوسٹ نادرا و ایلو ادارہ غاتون تین پہ تینی شریداری اٹ تینا ریونیوٹی ودکی کے، تینا ماڑی تا کمرشل کاریم اٹ اتسا پاکستان پوسٹ ءِ تینا مالی وسیلہ غاتے ودفوئی مریک، پاکستان پوسٹ ءِ ساڑی آ قول انا خواست آتا رداٹ پوسکن اصلاحات اتوئی مریک۔ بنجائی وزیر مواصلات پارت کرے کہ پاکستان پوسٹ نا ادارہ تینا خڑچ آتے کم کے و وسیلہ غاتیٹی ودکی کے، نیک نیتی و خواری اٹ کاریم کرسا ادارہ غاتے خودانحصاری اٹ ہم کنار کننگ کینہ۔ پاکستان پوسٹ نا خورک ماڑی تے ‘‘رینٹل پالیسی’’ نا رداٹ ملٹی نیشنل کمپنی تے کِراغا ایتر، بروک آ6 تُواٹی پاکستان پوسٹ ءِ تینا ریونیو ٹی کم از کم دونیم ارب روپئی ودفوئی مریک۔ اوپارے کہ پاکستان پوسٹ نا ساڑی آ حالیت آک است جم افس، کم آن کم وخت اٹی پیدوار گچینی اتوئی مریک، پاکستان پوسٹ ءِ بچفنگ کن بھاز زیات خواری و لگن نا گرج ءِ۔ عبدالعلیم خان پارت کرے کہ تدوک آ شش تُو اٹی پاکستان پوسٹ اٹی گچینی کن چندی گام گیج کننگانے۔ بنجائی وزیر مواصلات ءِ حوال اٹی پاننگاکہ پاکستان پوسٹ پرسنلائزڈ سٹیمپ ، آٹومیشن و ڈیجیٹلائزیشن و پین گام گیج کیک، اولیکو ریسہ ٹی پاکستان پوسٹ نا 50 ماڑی، ایلوٹی 100 و مسٹ میکو ٹی 200 ماڑی تا کمرشل کاریم اٹ اتنگ نا سلاہ ہم ڈٹ انا بشخ ءِ۔
