پاکستان ٹیکسٹائل و پُچ آتا پورو ویلیو چین تخوک آ دنیانا منہ ملک آتیٹی اوار ءِ، جام کمال

اسلام آباد۔ 28 اگست (اے پی پی) بنجائی وزیر واپار جام کمال خان پارینے کہ پاکستان دنیا نا منہ ملک آتیان اسٹ ءِ، ہراڑے ٹیکسٹائل و پچ آتا اسہ پورو ویلیو چین اس ساڑی ءِ، ہرا ملک انا راجی و اقتصادی شونداری ٹی تیناکڑد ءِ ادا کننگ ءِ، وزیراعظم برآمد کروک آتیکن آسانی ودی کننگ و واپاری کچ ءِ ودفنگ کن پدریسہ کاریم کننگ اٹی ءِ، ہرانابھرمک زوت مون آ بننگ نا بناءِ کیرہ۔ داخیال آتا درشانی ءِ او چارشنبے نادے آ پچ، فیبرکس، ٹیکسٹائل فائبر و ٹیکنیکل ٹیکسٹائل نا کونسلز نا نمائندہ غاتون ورچوئل میٹنگ اٹی کرے۔ اوڑدہی ٹی ٹیکسٹائل و پچ آتا صنعت ءِ زہمی کروک آ اہم ویل آتے ایسر کننگ آ چکار کننگا۔ کونسل آتا باسک آک برآمدی نموٹی اڑاند مروک آویل آتا پیدواری ءِ کریر ہرافتے ٹی ٹیرف، خراج، لیکویڈیٹی نا کمتی، ایس آراوز نا بابت پیچیدگی ، زیات کچ سود آ وام،محدود برآمدی فنانسنگ و ٹیرف نا بابت چیلنج آک اوار ءُ۔ میٹنگ اٹی بشخ ہلوک آک حکومت آن خواست کریر کہ او داویل آتے ایسر کننگ کن المی گام گیج کے۔ میٹنگ اٹ چنکا ونیامی درجہ نا کاروباری ادارہ غاتے سپورٹ کننگ و پوسکن آ پلگ اینڈ پلے گارمنٹس سٹی تا جوڑ کننگ نا گرج آ ہم ہیت کننگا۔ کونسل نا باسک آک پاریر کہ ساڑی آجہانی و جغرافیائی سیاسی حالیت آتا رداٹ پاکستان تون جہانی منڈی تسکان رسینگ نا جوان ءُ موقع اسے۔ او حکومت آ زور شاغا کہ او داحالیت آتیان فائدہ ہرفسا ہمو پالیسی تیا عملدرآمد کے ہراڑآن ملک اناویلیو ایڈڈ ٹیکسٹائل برآمد آتے سوگوی ملے۔ بنجائی وزیر واپار کونسلز نانمائندہ غاتے باوری کرفے کہ دا بشخ ءِ آوار کننگ، جہانی مسابقت ءِ ودفنگ و برآمد آتیٹی ودکی کن حکومت گام گیج کننگ اٹی ءِ۔ اوپارے کہ پوریاگر و کاروباری برادری نا کنڈآن بروک آ غٹ سلاہ و سوج آتے شین ترسا نیشنل ایکسپورٹ ڈویلپمنٹ بورڈ ءِ گڈیکو سجفنگ کن پیش کننگک۔