اسلام آباد۔ 14 ستمبر (اے پی پی) پاکستان وچین نا نیام اٹ سلہہ غاتا کنٹرول و بے تالانی آ ہڑتوم آ کنڈآتا سلابت نانہہ می دیوان اسلام آباد اٹی اڈ ہلک۔ تدوک آ دے داڑے اڈ ہلوک دیوان اٹی پاکستان نا وزارت خارجہ نا ڈائریکٹر جنرل (آرمز کنٹرول و تخفیف سلہہ ڈویژن) سفیر طاہر اندرابی وسن شیاؤ بوڈائریکٹر جنرل (آرمزکنٹرول ڈیپارٹمنٹ) ، وزارت خارجہ امور السی جمہوریہ چین تینا تینا ڈل آتا کماشی ءِ کریر۔ وزارت خارجہ نا کنڈآن جاری اعلامیہ نا رداٹ فریق آک سلہہ غاتا کنٹرول و بے تالانی نا ویل آتیا سرجمی اٹ گپ وتران کریر۔ داوخت آ جہانی و علاقائی سلامتی ، پوسکن ومون آ بروک ٹیکنالوجی، سائبر سیکورٹی، مصنوعی ذہانت، پیشن نا خلاو جوہری ٹیکنالوجی ناپرامن کاریم اٹ اتنگ اٹی ہڑتوم آکنڈآتا کمکاری، کثیر الجہتی فورم تیا ایجنڈا و حرکیات بشمول اقوام متحدہ ناجنرل اسمبلی نا کمیٹی، سلہہ غاتا چٹفنگ ناکانفرنس، جہانی جوہری توانائی ایجنسی (IAEF)، کیمیائی سلہہ غاتا ممانعت نا تنظیم (OPCW)و دانا بابت کنونشنز /ٹرینی باڈی تتون اوار سلہہ غاتا چٹفنگ نا چندی گمان تا جاچ ءِ ہلنگا۔ ڈائریکٹر جنرل سن شیاؤبو سیکرٹری خارجہ سفیرآمنہ بلوچ تون ہم اوڑدہی کرے۔ پاک چین ہڑتوم آ کنڈآتا تعلقداری نا مثبت رفتار ءِ تالان کرسا اوپاک چین سٹریٹجک ڈائیلاگ نا اسہ اہم ءُ بشخ اسے نا وڑاٹ سلہہ غاتا کنٹرول و بے تالانی آ باقاعدہ تبادلہ و سلابت نا اہمیت آ زور شاغا۔ یات سلے کہ پاکستان وچین بروک آسال بیجنگ اٹی سلہہ غاتا کنٹرول و بے تالانی آ ہڑتوم آ کنڈآتا سلابت نا 10 می دیوان ءِ اڈایترہ۔
