اسلام آباد۔ 03 ستمبر (اے پی پی) بنجائی وزیر خزانہ ومحصولات سینیٹر محمد اورنگزیب پارینےکہ آجو زرگزران نا ٹک آک گچین وپاکستان نا زرگزران سہی وڑاٹ مون آہِننگ ءِ، زرگزرانی سوگوی نا بنداو ءِ تخنگانے، پنجرجاٹی اصلاحات ناعمل برجاسلک، خراج آتا بھاریم ءِ ہرفنگ اٹ غٹ تپہ غاک تینا کڑد ءِاداکیر، صوبہ غاتاسلابت اٹ آئی ایم ایف تون باندات آتے مون آ دننگ انگ ءِ، پنجرجاٹی اصلاحات نا تسلسل برقرارتخنگ آن زرگزرانی خودکفالت دوئی کننگ کینہ۔ سے شنبے نادے آ قومی زرگزراننااہم پلو نا بابت خصوصی گپ وتران کرسا وزیرخزانہ سینیٹر محمد اورنگزیب پارے کہ زرگزرانی سوگوی نا بابت گچین پیش رفت مسنے۔ تدوک آ 6 تُو اٹی نن ہراسفر آ پیش تماسن اوداسکان گامزن ءِ، اونا حقی بھرم تا بننگ بناکرینے۔ زرمبادلہ نا کوڑیک ودسا 2 تُو انا درآمد آتیکن گنج اسے ءُ۔ کرنسی مستحکم ءِ، حسابات جاریہ ناکھاتہ غاتا نسخان کم مسنے۔ ہندا وڑ لیٹر آف کریڈٹس ، درآمدات و زرکاری آ کٹیانا منتقلی نابابت بیک لاک چٹفنگا۔ وزیرخزانہ پارےکہ افراط زر انا کچ 38 درسد اسکان سرمسوسس۔ تدوک آ سال اگست اٹی افراط زر انا کچ 32.7 درسد ئس ہراداسہ کم مرسا 9.6 درسد مسنے۔ پالیسی ریٹ اٹی پدریسہ کمتی بننگ ءِ ہراڑآن زرگزران ءِ کمک ملنگ ءِ۔ پالیسی ریٹ اٹی کمتی آن صنعت و ایلو بشخ آتے بھاز فائدہ رسینگک۔ داگام گیج آتیٹی وزارت خزانہ، اسٹیٹ بینک و ایلو ادارہ غاتا کڑد سفت نا قابل ءِ۔ اوپارےکہ جولائی ٹی زرراہی تس اٹی نمان ودکی مون آبس۔ فچ و موڈیز پاکستان نا کریڈٹ ریٹنگ اٹ اسہ نوچ نا ودکی کرینے ہراملکی زرگزران آ جہانی ادارہ غاتا پت انا درشانی ءِ۔ وزیرخزانہ پارے کہ آجو زرگزران نا سوگوی آن پد نن پائیدار نمو نا کنڈآ ہنوئی ءِ۔ زرگزرانی سوگوی نا بنداو آتے تخنگانے۔ مستین اٹ ہراتم کہ نمو مسکہ تو اوڑتون اوار اوار نسخان آک ہم ودارہ۔ داحالیت آتا رداٹ زرگزران نا بنداوتے سوگو کننگ المی ءِ۔ وزیرخزانہ پارےکہ محصولات نا بنداو و کچ اٹی ودکی المی ءِ۔ تدوک آسال ایف بی آر نا محصولات آتیٹی 29 درسد ودکی مس ولے اوکان پد ہم جم قومی پیدوار نا رداٹ خراج آتا کچ 8.8 درسد نا خڑک ئس۔ اسہ ملک اس ہم داکچ اتون پائیدار بنداوتیا مون آہِننگ کپک۔ جم قومی پیدوار نا رداٹ خراج آتا کچ 13 درسد اسکان ودفنگ کن سنبرینگوک اُن۔ وزیرخزانہ پارےکہ قومی زرگزران نا 43 درسد بشخ اسہ درسد آن کم خراج تننگ ءِ، خراج آتا بھاریم ءِ غٹ تپہ غاتے اواری اٹ ہرفوئی ءِ وخت اس کہ تنخواہ دارو مینوفیکچرنگ بشخ مہالو آن زیات خراج تننگ ءُ، ہول سیلرز، ڈسٹری بیوٹرز وریٹیلرآتیان خواست ءِ کہ اوملکی زرگزران کن تینا کڑد ءِ ادا کیر۔ حکومت ہم اوفتا روا ویل آتے بِنک و اوفتا جوان انگا سلاہ ومشورہ غاتیا عملدرآمد مریک، ایف بی آر خراج ریٹرن فائل کننگ نا فارم ءِ ہم آسان کرینے۔ وزیرخزانہ پیدوار لوز آتیٹی پارینے کہ ہول سیلرز ، ڈسٹری بیوٹر و ریٹیلر آتیا خراج نا بابت گام گیج پدی مفک اگہ دا گام گیج آتے پدی کننگاتو او تپہ غاک ہم بدبیسہ مریرہ ہرامہالو آن زیات خراج تننگ ءُ، ہنداسوب آن غٹ ءِ تینا تینا کڑد ءِ ادا کروئی ءِ۔ وزیرخزانہ پارے کہ خراج نانظام اٹی اصلاحات نا چرجوئی برجاءِ ۔ دانا بھرمک برجاتُو اٹی مون آبریرہ۔ ایف بی آر تینٹ پارینے کہ 98ارب روپئی ناشارٹ فال ءِ ولے داہم ہُننگے کہ 132ارب روپئی نا ری فنڈہم جاری مسنے ہرا اہم ءُ پیش رفت اسے و داڑآن کیش انا ویل آتے ایسر کننگ اٹ کمک رسینگک۔
