اسلام آباد۔ 20 اگست (اے پی پی) نائب وزیراعظم و وزیرخارجہ سینیٹر محمد اسحاق ڈار پارینے کہ پاکستان ءِ ولدا آن زرگزرانی قوت جوڑ کننگ ننا ہدف ءِ، ورناک تعلیم ، کسبکاری و ٹیکنالوجی نا بشخ آتیٹی زرکاری نا ذریعہ جوڑ مننگ کیرہ، پاکستان نا ورناتیٹی بے پناہ لائخی ارے، ملک انا ورناتیٹی مثبت بدلی نا سوب جوڑ مننگ نا لائخی ارے۔ داخیال آتا درشانی ءِ او سے شنبے نادے آ داڑے یوتھ کنونشن آن تران کرساکرے۔ اوپارے کہ تعلیم ہر چنا وورنانا حق ءِ، تعلیم آن ملک انا آخبت روشنامریک۔ نائب وزیراعظم پارے کہ غٹ چناتے پاوہ کہ ہیل کننگ نا عمل ءِ مدام برجاتخر، تخلیق و تعلیم نا امتزاج ءِ تینا کرسا شونداری نا پوسکن ءُ کسر پٹر۔ اوپارے کہ سیوت اٹی ننا آخبت ءِ، خار ءِ بایدے دفن کننگے۔ نائب وزیراعظم پارے کہ دورہ ءِ بلوچستان اٹی پاننگاکہ گڑاس بلوچ ناراض ءُ، ای پاوہ کہ کس اس تینا دھرتی لمہ غان ناراض مفک، تینا ویل آتا ایسراس تولسا پٹر ولے ناراضگی نا پن آ دہشت گردی نا ہچ ءُ گنجائشت اس اف۔ محمد اسحاق ڈار پارے کہ ورناچین خواری ءِ تینا اولیت کیر ، حکومت ورناتے بھاز انگا آسراتی فراوان کننگ ءِ، خصوصی زرکاری کونسل نا جوڑ کننگ نا مسخت ورناتے واکدار کننگ ہم ارے، ورناک تعلیم، کسبکاری و ٹیکنالوجی نا بشخ آتیٹی زرکاری نا ذریعہ جوڑ مننگ کیرہ ۔ اوپارے کہ شونداری و شونہالی نا قول اٹ ورناک شریدار ءُ۔ نائب وزیراعظم پارے کہ 1998 ٹی پاکستان ایٹمی قوت جوڑ مس، نن تینا دفاع غا وخت اس ہم سمجھوتہ کتنون، قومی مفاد ننا غٹ آن اولیکو اولیت ءِ۔ اوپارے کہ ننے بے پناہ چیلنج مون تروک ءِ، پاکستان نا آخبت اینو نا ورناتا دوٹی ءِ، 2013 نا حکومت اٹ پاکستان ءِ ہراکان ہراڑے سرکرین، ہمووخت آ پاکستان نا بارواٹی ڈیفالٹ نا پاننگا ولے پاکستان دنیا نا مون آ بروک زرگزران جوڑ مس۔ محمد اسحاق ڈار پارے کہ پی ڈی ایم حکومت پاکستان ءِ بچفنگ کن ئس، ننا دشمن خوائسکہ کہ پاکستان ءِ زرگزرانی وڑاٹ چٹفنگے۔ اوپارے کہ پاکستان ءِ ولداآن زرگزرانی قوت جوڑ کننگ ننا ہدف ءِ۔
