اسلام آباد۔ 10 ستمبر (اے پی پی) اسپیکر قومی اسمبلی سردار ایاز صادق پارینے کہ پارلیمنٹ ہاؤس نا غٹ داخلی درگہ غاتا ویڈیو فوٹیج آتے بٹنگانن اوکان پد زموار آتا برخلاف ایف آئی آر نوشتہ کرفنگک۔ سےشنبے نادے آقومی اسمبلی ٹی چندی باسک آتا کنڈآن چست کروک اعتراضی ٹک آتیا رولنگ ترسا اسپیکر پارے کہ تدوک آنن انتس کہ پارلیمنٹ اٹی مس او واقعہ غا ننے سٹینڈ ہلوئی مریک، ای پارلیمنٹ نا داخلی درگہ غاتا ویڈیو فوٹیج آتے بٹنگانٹ۔ اوپارے کہ ای تینے بدبخت تکیوہ کہ 2014 ٹی پارلیمنٹ آ جلہو مس تو ای اسپیکر ئسٹ، داسہ تدوک آ دے ہم کنا ہی دور اٹی داواقعہ مس، ویڈیو فوٹیج آتے ہرسا ہرانا برخلاف ہم ایف آئی آر درج کرفوئی ءِ، ای درج کرفیوہ۔ وزیرکانود اعظم نذیر تارڑ پارے کہ اسپیکر ہراہیت ءِ کرینے اوڑآن اختلاف کننگ مفک۔ ہنین دسنگ آن ہنین خرک۔ داداایوان نا تقدس نا ویل ءِ داڑآن کس اس پدی مفک۔ آئین وکانود نا پاسداری بایدے مرے۔ اسپیکر چیمبر اٹی تولسا داویل انا ایسر اس کشنگے۔ داکان مست علی محمد خان اعتراضی ٹک آ پارے کہ پارلیمنٹ نن غٹ انا جمہوری اُراءِ ، بھاز مشکل اٹ داڑے رسینگانٹ۔ کنا مقدمہ جمہوریت ءِ ننا نظریاتی اختلافات ءِ ۔ تدوک آ نن نا واقعہ نا مرتکب بندغ آتا برخلاف کانودی کارروائی کننگے۔ سید نوید قمر پارےکہ واقعہ نا جاست وپاست و المی کارروائی مرے۔ ایم کیو ایم نا سید مصطفیٰ کمال پارے کہ تدوک آ دے ہراواقعہ مسنے اسپیکر دابابت بایدے تینا کڑد ءِ اداکے۔
