اسلام آباد۔ 03 ستمبر (اے پی پی) وزیراعظم محمد شہباز شریف زرگزرانی سوگوی، محصولات آتا وصولی ٹی وڈی خوری نا توننگ، اسمگلنگ نا چٹفنگ، گچین روزگار نا وارخواہی ودی کننگ و خڑچ آتیٹی کمتی نا عزم انا درشانی ءِ کرسا پارینے کہ کبینی نا بھاریم کرار کرار آ کم مننگ اٹی ءِ، کبینی نا کچ اگست اٹی 9.6 درسد آن شیف بسنے، رائٹ سائزنگ و ڈاؤن سائزنگ تون اوار اوار گردشی وام تیٹی ہم کمتی اتوئی مریک، آئی ایم ایف تون دا ننا آخیریکو پروگرام بایدے مرے، ملک تینا نت تیا سلسا ضرور شون ہلیک۔ داخیال آتا درشانی ءِ وزیراعظم سے شنبے نادے آ بنجائی کابینہ نا دیوان اٹی گپ وتران کرساکرے۔ وزیراعظم پارے کہ کبینی نا بھاریم کرارکرار آ کم مننگ ءِ۔ اگست اٹی افراط زر انا کچ 9.6 درسد آ بسنے۔ تدوک آ سال ہندا تُو دانا کچ 27 درسد ئس۔ دابھاز ستاکڑزوک ءُ ہیت اسے۔ داڑآ وزیرخزانہ و گورنر اسٹیٹ بینک ، غٹ تعلقدار وزارت آتا آفیسر آتا کارکڑد ستاکڑزک۔ دابھاز جوان ءُ سرسہبی اسے، سفرمرغن ءِ ولے ننے ترندی اٹ مون آ ہنوئی ءِ۔ زرگزران ءِ شون تروئی ءِ و داٹی سوگوی اتوئی ءِ۔ روزگار نا وارخواہی تے ودفوئی ءِ۔ خڑچ آتیٹی ترندی اٹ کمتی کروئی ءِ، داڑکن رائٹ سائزنگ و ڈاؤن سائزنگ ءِ پک کروئی ءِ۔ بجلی و گیس انا گردشی وام تے ہم کم کروئی ءِ۔ وزیراعظم پارے کہ خراج دُزی و وڈی خوری ءِ توروئی ءِ ۔ روزگار نا گچین وارخواہی فراوان کننگ ننا اولیت ءِ۔ داکان بیدس اسمگلنگ ءِ ہم چٹفوئی ءِ۔ دا غٹ باندات آتیا دے و نن کاریم مننگ اٹی ءِ۔ سفر مشکل ضرور ارے ولے ناممکن اف۔ اگہ نن تینا ہدف آتیا چکار تخن تو تینا مزل ءِ ضرور سرمرینہ۔ اگہ زبانی ہیت و کاغدی کارروائی آن زیات عملدرآمد آ چکار تخن تو تینا مسخت آتے دوئی کننگ کینہ۔ زرگزران نا گچینی کن غٹ سمت آتیٹی سنجیدگی اٹ مون آ ہِننگ اُن۔ دے و نن خواری کروک آ قومک تینا حالیت آتے گچین کریر، پاکستان ءِ اللہ تعالیٰ معدنیات ، قدرتی وسیلہ و قابل ذہن آتیان شپ کرینے۔ پاکستانی قوم خاص کر ورناک بھاز لائخ ءُ۔ آئی ایم ایف نا پروگرام نا لوازمات آتے پورو کننگ کن گام گیج کننگ اُن۔ آئی ایم ایف بورڈ اٹی ننا کیس کاہک تو پوسکن آ سفر بناکیک ولے دا ملکی تاریخ نا آئی ایم ایف نا آخیریکو پروگرام باندے مرے۔ ملک تینا نت تیا سلک و شون ہلیک۔
