اسلام آباد۔ 11 ستمبر (اے پی پی) وزیراعظم محمد شہباز شریف پارینے کہ تحریک آزادی پاکستان جمہوریت و کانود نا حکمرانی کن قائد اعظم نا بدل مفروک تعلقداری نا ڈیک ءِ، ننا زمواری ءِ کہ تینا بروک آ چین تیٹی دیانت، خواری و حب الوطنی نا ہمو قدر ودی کین ہرافتا قائد اعظم عملی نمونہ ئس، اقوام عالم نا تاریخ اٹی قائد اعظم محمد علی جناح نا پن مدام اسہ صاحب بصیرت و پنی ءُ سیاست دان اسے نا وڑاٹ نوشتہ کننگک۔ قائد اعظم محمد علی جناح نا 76 می کزیہ دے انا وخت آ تینا کلہو اٹی وزیراعظم پارے کہ کنتون اوار مچ آ قوم بابائے قوم قائد اعظم محمد علی جناح نا 76 می کزیہ دے ءِ بھاز شان و شرف اٹ اڈتننگ ءِ۔ اوپارےکہ اقوام عالم نا تاریخ نا پنہ غاتیٹی قائد اعظم محمد علی جناح نا پن مدام اسہ صاحب بصیرت و پنی ءُ سیاست دان اسے نا وڑاٹ نوشتہ کننگک، اومسلمانان برصغیر کن آجوئی نا تحریک نا اسہ ہندن ءُ بے مٹ و گچین کماشی اس کرے کہ رہینگوک آ دنیا اسکان دا ڈیہہ انا مسلمان تیکن دنیا نا اولیکو اسلامی نظریاتی ریاست جوڑ مس، تحریک آزادی پاکستان جمہوریت و کانود نا حکمرانی کن قائد اعظم نا بدل مفروک تعلقداری نا عکاسی ءِ کیک، داتحریک نا سرسہبی و اسہ آجو ووتواجہ پاکستان اسے نا قیام بابائے قوم نا سیاسی سوچ نا وسعت و دوراندیش سرکڑدہ ئی نا عملی شاہدی ءِ۔ اوپارے کہ جمہوریت ، راجی انصاف و بریبری نااصول آتیکن اونا سخت جہد اسہ ہند ن ءُ راج اسے نا بنداو ءِ تخا ہراڑے متنوع دودوربیدہ غاتیان پد ہم ہر شاری ءِ اسہ وڑ شونداری نا وارخواہی دُوبرے، قائد اعظم نا سیوت و ایمان نا متکن آ اصول آتیا زور ننا راج انا تانہ بانہ ٹی کڑمبی اٹ پِنک ہراننے یات ترفک کہ پاکستان نا طاقت اونا حسین دودوربیدہ ئی تضاد ات و جامعیت اٹی ءِ۔ وزیراعظم پارے کہ اینو نادے نن قائد اعظم نا تروک آ روشنا اصول آتا پیروی ءِ کرسا قائد نا پاکستان نا دوئی کننگ اونا نظریہ غاتے عملی دروشم اس تننگ نا قول انا پوسکنی ءِ کینہ، ننے تینا نظریاتی اساس ءِ ذہن اٹ تخسا ساڑی آ چیلنج آتے اسہ عظیم قوم اسے آنبار مسخر کننگ ءِ۔ اوپارے کہ قائد اعظم ءِ یات کرسا ننے تینا بروک آ چین تا بابت تینا فرض ءِ ہم یات تخوئی ءِ ، ننا زمواری ءِ کہ نن تینا بروک آ چین تیٹی دیانت، خواری و حب الوطنی نا ہمو قدر ءِ ودی کین ہرانا قائد اعظم عملی وڑئس۔ اوپارےکہ اینو نن اسہ ہندن ءُ پاکستان اسے نا دوئی کننگ کن سخت خواری کننگ نا تینا قول انا پوسکنی ءِ کینہ ہرا ننا بانی نا نظریہ غاتے عملی دروشم اس بیرفک، اسہ ہندن ءُ قوم اس ہراڑے امن و انصاف مرے و ہرشاری ءِ شونداری نا اسہ وڑ موقع رسینگے۔
