اسلام آباد۔ 20 اگست (اےپی پی) وزیراعظم محمد شہباز شریف فلسطین نا ویل انا انصاف اٹ و دیرپا ایسری کن پاکستان نا پکا عزم و مخ تفی نا درشانی ءِ کرسا پارینے کہ فلسطین نا آجو ریاست نا جوڑ کننگ ہی دا ویل انا پائیدار ایسرءِ۔ اوداخیال آتا درشانی ءِ سے شنبے نادے آ داڑے فلسطین نا دزکش مروک آ سفیر احمد جواد عبدالعزیز رابعی تون گپ وتران کرسا کرے ہرا وزیراعظم ہاؤس اٹی اوڑتون اوڑدہی کرے۔ اوڑدہی ٹی وزیراعظم فلسطینی الس و اوفتا حق خودارادیت کن پاکستان نا بدل مفروک مخ تفی نا درشانی ءِ کرے۔ او7 اکتوبر 2023 آن برجا غزہ ٹی کودک فلسطینی تا برخلاف اسرائیل نا جارحانہ کارروائی تا ترندی اٹ مذمت ءِ کرے ہراٹی زالبول و چناتتون اوار 40 ہزار آن زیات بے گناہ فلسطینی شہید و90 ہزار آن زیات ٹھپی مسر۔ وزیراعظم دوریاستی ایسری نا کمک اٹ فلسطین نا ویل انا انصاف اٹ و دیر پا ایسری اس پٹنگ نا کوشست آتیکن پاکستان ناپکا عزم و مخ تفی نا درشانی ءِ کرے۔ وزیراعظم پارے کہ اقوام متحدہ نا تعلقدار قرارداد آتا رداٹ 1967آن مہالو نا سیم و القدس نا دارالحکومت نا وڑاٹ فلسطین نا اسہ آجو ریاست اسے نا جوڑ کننگ ہی دا ویل انا پائیدار ایسر ءِ۔ احمد جواد عبدالعزیز رابعی تینا پنچ سال انا دور ءِ تعیناتی ٹی پاکستان نا کنڈآن گچین مہمانداری آ وزیراعظم نا منت واری ءِ ہرفے۔ او فلسطین نا ویل آ پاکستان نا تاریخی و پبی موقف و ڈیہہ اٹی امن و سوگوی کن جہانی کوشست آتیٹی پاکستان نا کڑد انا ستاءِ کرے، احمد جواد عبدالعزیز رابعی فلسطینی طالب علم آتے پاکستان اٹ تعلیم پورو کننگ کن غٹ آسراتی فراوان کننگ و وظیفہ غاتا پیش کش آ حکومت پاکستان نا منت واری ءِ ہرفے۔
