اسلام آباد۔ 08 اکتوبر (اے پی پی) وزیراعظم محمد شہباز شریف پارینےکہ پاکستان نا زرگزران مثبت کنڈآ ہِننگ ءِ، قوم اتون قول ءِ کہ ہچ کس ءِ 2014نا تاریخ ءُ دوہرائفسا ملکی زرگزران ءِ نسخان تننگ کن الیپنہ، تحریک انصاف پاکستان نا زرگزران آ کاری ضرب اس خلک، سازشی زموارآک ملکی زرگزران ءِ ڈی ریل کننگ خوارہ، چین نا وزیراعظم ہڑتوم آ کنڈآتا دورہ غا پاکستان آ بننگ ءِ، سعودی عرب آن ڈل زوت پاکستان آ بننگ ءِ ہراڑے 2 ارب ڈالر نا معاہدہ گمانی ءِ، ننا کوشست آتے اٹ خراج نیٹ ءِ ودفنگانے، کبینی ٹی نمان کمتی مسنے، روزگار نا وارخواہی ودی مسنے، برآمد آک ودانو۔ سے شنبے نادے آ داخیال آتا درشانی ءِ وزیراعظم بنجائی کابینہ نا دیوان اٹی گپ وتران کرساکرے۔ وزیراعظم پارے کہ تدوک آ دے کراچی ٹی دہشت گرد آتا جلہو آتیٹی 2 چینی انجینئر زوال وخت اس کہ اسٹ اس ٹھپی مس۔ بشام آن پد دا ارٹ میکو است ہسون واقعہ ئس۔ بشام نا واقعہ غان پد چین نا کنڈآن اوفتا شاری تا رکھ اکن پین گام گیج کننگ نا خواست کننگا۔ دورہ ءِ چین اٹی اوفتے دا بابت پبی باوری کرفین ولے بدبختی اٹ تدوک آ دے داواقعہ پیش بس۔ پاکستانی الس و حکومت داواقعہ غا چینی الس و سرکڑدہ غاتون است ہسونی نا درشانی ءِ کیرہ۔ چین نا سفارت خانہ غاہنسا چینی سفیر تون ہم اوڑدہی مس و اوڑتون ہڑزخواہی کرین۔ وزیراعظم پارے کہ غٹ ترکوشست آتیان پدہم داواقعہ رونما مس ہراڑآ افسوز ءِ۔ دانا دامطلب اف کہ نن باندات آتے ہنداڑے اِلن، ننا عزم مہالوآن بڑز ءِ۔ سیکورٹی ءِ پین فعال کننگ کن ہرممکن گام گیج کینہ۔ وزیراعظم پارے کہ شنگھائی کمکار تنظیم نا سروک دیوان مننگ والا ءِ، داڑکن ہرگمانی رکھی گام گیج کننگانے۔ دابابت سیکورٹی آ جوان میٹنگ اس مس، دامچ آ حالیت آتیان ہم چینی سفیر ءِ معلومدار کرین۔ وزیراعظم پار ے کہ چین ، سعودی عرب و متحدہ عرب امارات مستین آنبار اسہ وارولدا آئی ایم ایف پروگرام اٹی ننا پبی کمکاری ءِ کریر۔ وزیراعظم پارے کہ اسہ کنڈآ ملک اٹی دھرنہ غاک برجاءُ و ایلو کنڈآ داسہ ملائیشیا نا وزیراعظم انور ابراہیم پاکستان نا سرسہب دورہ ءِ کرے۔ اوڑتون جوان گپ وتران مس، حلال سُو و برنج نا برآمدنا بابت ہیت مس۔ ایلو بشخ آتیٹی کمکاری ءِ ودفنگ آ گپ وتران مس۔ چین نا وزیراعظم نا گمانی دورہ و بھلو وخت اسے آن پد پاکستان اٹ شنگھائی کمکار تنظیم نا دیوان ناوخت آ چینی باتی تے ہدف کننگ ہرانا زمورای ءِ بی ایل اے امنا کرینے، است ہسونی اسے۔ بنجانا زی آ بننگ نا دھڑکو و دشنام طرازی کون آ است ہسون گپ وتران کننگ انگ ءِ۔ داوڑنا واقعہ غاک ننے دُوارہ 2014نا کنڈآ دننگ کیرہ۔ 2014 ٹی ڈی چوک آ مسہ تُو آن زیات نا دھرنا تننگا۔ ہمووخت آ چینی صدر نا پاکستان نا دورہ ئس، اوکان پد ہم تحریک انصاف و اونا سرکڑدہ غاک دانا ادراک ءِ کتور کہ دادورہ نا ملتوی مننگ آن اخس نسخان مریک۔ داڑآن پاکستان نا زرگزران و ساکھ ءِ نسخان رسینگک۔ حکومت پاکستان نا پورو کوشست آن پد ہم دا دھرناءِ موخر کننگتو۔ ہمووخت آ سی پیک نا شروعات مسکہ ہرانا رداٹ ارب آ ڈالر نا زرکاری مروئی ئس، داکان زیات پاکستان ءِ نسخان تننگ نا پین ہچ ءُ چم اس مننگ کتوکہ۔ دادھرنہ نا سوب آن 7 تُو انا تاخیر آن پد اپریل 2015 ٹی چینی صدر پاکستان آ بس۔ دادور اٹی ملک اٹی 20، 20 گھنٹہ لوڈشیڈنگ ئس۔ ننا صنعت آک بندمسرہ۔ برآمد آتیٹی بھاز مشکلات ئس ولے بانی پی ٹی آئی تینا ضد ءِ الیتو، اینو اسہ وار ولدا ہنداتاریخ ءِ دُوارہ کننگ انگ ءِ۔ اسلام آباد آ بننگ انگ ءِ، داپاکستانءِ نسخان تننگ ناناپاک عزم ءِ۔ وزیراعظم پارےکہ داغٹ انت اکن مننگ ءِ داناہراسٹ ءِ سماءِ انتئے کہ خزانہ ٹیم انا شاندار کوشست و ٹیم ورک آن آئی ایم ایف نا پروگرام منظور مسنے۔ کبینی نا کچ اسہ سال اٹی 32 درسد آن کم مرسا 6.9 درسد آبسنے۔ برآمد و ترسیلات زر اٹی ودکی مسنے۔ آئی ٹی برآمد آک ودانو۔ اسٹاک ایکسچینج تاریخ نا بڑزکو انگاکچ آٹی ءِ۔ اسہ مچی اسے پاکستان نا شونداری ونیزگارنا جوڑ مروک حالیت منظور اف۔ کبینی نا بھاریم کم مرے، اوفتے سما ءِ کہ اگہ زرگزران سہی مس وملک تینا نت تیا سلیس تو ولدا ننے آن دیر اس اریفک۔ اوپارےکہ ساڑی آ برانز اٹی اسہ پولیس کانسٹیبل اس شہید مس۔ ہراڑے ہڑدڑنا چاگڑد مریک، دھرنہ تننگے تو ہموڑے دِیر اس زرکاری کیک۔ زرکاری ہموڑے مریک ہراڑے حالیت آک پرسکون مریر و امن مرے۔ خیبرپختونخوا نا وزیراعلیٰ نا کماشی ٹی بنجاغا بننگ نا کارروائی کننگ انگ ءِ، اوفتے تون اوار اوغان شاری و پولیس ناکارندہ و سرکاری ملازم آک ساڑی ئسر ہراکان سم کاری کننگا۔ ہراڑے اسہ کنڈآ ملک ءِ شونداری و شونہالی نا کسر آ دننگ کن داخہ در کوشست کننگ انگ ءِ۔ الس ءِ داحالیت آتیان معلومدار کپننگ زیاتی اسے۔ ملک انا زرگزران نا گچینی ناکسر اٹ اسہ سجفوک سازش اسے اٹ اڑاند شاغنگ انگ ءِ۔ داکان زیات ملک دشمنی و زیاتی ہچ اس مننگ کپک۔ وزیراعظم ایم ڈی آئی ایم ایف نا پاکستان کن پروگرام نا منظوری آ منت واری ءِ ہرفے۔ جنرل اسمبلی نا دیوان نا وخت آ اوڑتون و آئی ایم ایف نا سروک تون جوان گپ وتران مس۔ اوننا 7 تُو انا دور اقتدار نا اصلاحات آتاستاءِ کرے۔ اوپارے کہ ننا کوشست آتیان فائلر آتا کچ اِرا ہنداخہ مسنے۔ داڑکن دے و نن خواری کننگا۔ وزیرخزانہ، سیکرٹری خزانہ، چیئرمین ایف بی آر ہرا اسہ ستاکڑزوک ءُ آفیسر اسے۔ داغٹ انا خواری اٹ خراج نیٹ ودنگ ءِ۔ ایف بی آر نا ڈیجیٹائزیشن مننگ ءِ، داڑے اصلاحات اتنگ انگ ءِ ، اوفتے ہندا گڑاتا ڈکھیائی ءِ۔ بجلی نا صارف آتے 50 ارب روپئی نا سبسڈی تننگا۔ پنجاب حکومت نا کنڈآن 55 ارب روپئی آن 2 تُو اکن آسراتی تننگا۔ پیٹرولیم مصنوعات آتا نہاد آتیٹی پدریسہ کمتی کننگا ہراڑآن نیزگار بندغ ءِ ریلیف ملا۔ سعودی عرب آن ڈل پاکستان آ بننگ ءِ۔ اوفتے تون 2 ارب ڈالر آن زیات نا معاہدہ مننگ ءِ۔ داکوشست آتے لتاڑنگ کن اِلیپنہ۔ 2014 نا سازش ءِ داسہ دُوارہ مننگ کن الیپنہ و نئے سگنہ۔ قوم اتون قول ءِ داوڑمننگ کن الیپنہ۔پھساتیک ہوش کیر۔گھیراؤ جلاؤ، کرینگ و قوم انا تہہ ٹی تقسیم در تقسیم آن بیدس اوفک ہچ اس کتور۔ نواز شریف 20 گھنٹہ نالوڈشیڈنگ ءِ چٹفے۔ او 300 ارب ڈالر پدی اتنگ و کرپشن نا چٹفنگ نانعرہ ءِ خلک ولے قوم خنا۔ وزیراعظم پارے کہ ملک انا خذمت اسہ سنجیدہ ءُ کاریم اسے۔ اینو پاکستان اٹی ٹک آک مثبت ءُ، مخلوط حکومت نواز شریف نا کماشی ٹی اوٹی تینا پورو بشخ ءِ شاغنگ ءِ۔ دنیااودے مننگ اٹی ءِ۔ وزیراعظم پارے کہ اسہ کنڈآ دہشت گرد آتا برخلاف سیکورٹی فورس آک مون تننگ ءُ۔ چین و پاکستان نا نیام اٹ فاصلہ ودی کننگ کن چینی شاری تے شست کننگ انگ ءِ۔ خارجی و داجاگہ نا دشمنک اسٹ مسنو۔ اوفتا فنانسنگ ہراکان مننگ اٹی ءِ۔ اوپارے کہ اگہ نن داسہ ہوش کتون تو تینا دوست نما دشمن تے درست کتون و7 تُواٹی ہراسرسہبی تے دوئی کرینن اوفتا رکھءِ کتون تو اسہ وار ولدا ملک و زرگزران ءِ نسخان مریک۔ ننے اومیت ءِ کہ اگہ داکسر آ ہنان تو پاکستان تینا گوہوک آ ہند ءِ دوئی کیک۔ داڑکن خواری بنداوی شڑت ءِ۔ کابینہ نا دیوان اٹی زوت آتے اٹ دہشت گردی ٹی شہید مروک آ پاک فوج و پولیس ناکارندہ غاتا روح انا ثواب کن دعاپاتیا ہم کرفنگا۔ بنجائی وزیر احسن اقبال دعاکرفے۔