مذہبی ، دودوربیدہ ئی و  خاہوتی بشخ آتیٹی شعور بیدار کننگ اٹ زالبول آتا اہم ءُ کڑد اسے، بنجائی وزیر سالک حسین نا جہانی کانفرنس آن تران

قاہرہ۔ 25 اگست (اے پی پی) بنجائی وزیر مذہبی امور و بین المذاہب ہم آہنگی چوہدری سالک حسین خاص کر مذہبی ، دودوربیدہ ئی ، راجی و خاہوتی بشخ آتیٹی شعور بیدار کننگ اٹ زالبول آتا اہم و فعال کڑد ءِ تالان کرسا پارینے کہ راج انا اجتماعی راجی آسودہی و گچین آخبت نا ٹہیفنگ اٹ زالبول آتا کڑد ءِ مون آ دننگ اٹ نن غٹ اواری اٹ کوشست آتے بایدے کاریم اٹ اتین۔ آب اٹ تعلیم ودراخ جوڑی خذمت آتا فراوانی، نیزگاری نا چٹفنگ و کمیونٹی تے واکدار کننگ نا کوشست آتیٹی زالبول آک پیش پیش مسنو۔ دا مساعی ٹی زالبول آتا کمکاری ءِ کرسا نن تینا راج انا پنجر ءِ سوگوی ایتنہ۔ اوداخیال آتا درشانی ءِ یک شنبے نادے آ  داڑ ے مصر انا سپریم کونسل اسلامی امور نا 35 می جہانی کانفرنس آن تران کرساکرے ہرانا سرحال’’ شعور نا بیداری نا ٹہیفنگ اٹ زالبول نا کڑد‘‘ ئس۔ بنائی دود اٹی مصر انا وزیر اوقاف ڈاکٹر اسامہ الزہری، مصری وزیر راجی یکجہتی ڈاکٹر مایامرسی، مصر انا مفتی ڈاکٹر نظیر عیاد تون اوار چندی اسلامی ملک آتا وزیر ، عالم دین، دانشور و چندی بشخ آتیان تعلق تخوک آ شخصیت آک بشخ ہلکر۔ بنجائی وزیر پارے کہ داکانفرنس ناسرحال زیات انصاف اٹ و روشنا خیال دنیاکن ننا اجتماعی کوشست آتا غمازی ءِ کیک، داسرحال نا ننا پٹ وپول چار اہم بشخ آتا چھان بین آ تالان ءِ ہرافتے ٹی زالبول اہم مسنو و مریرہ۔ دا بشخ مذہبی بیداری، دودوربیدہ ئی بیداری، کمیونٹی خذمت، و خاہوت و چناتا نشوونما نا پرورش آ تالان ءِ ۔ بنجائی وزیر چوہدری سالک حسین پارے کہ دا بشخ آتیان ہر اسہ بشخ نئے بیرہ زالبول آتا بے مٹ خذمت بلکن پین شونداری واثرآتا گمان تے ہم تالان کیک۔ اوپارےکہ بیداری ودی کننگ خاص وڑاٹ علم ءِ تالان کننگ، بدلی ءِ مون آدننگ و انصاف  ءِ برقرارتخنگ اٹ زالبول نا کڑد ءِ اسلام اٹی جوانی اٹ امنا کننگانے۔ دارداٹ اوقرآن نا اسہ آیت اسے نا حوالہ ءِ تس ہراٹی داہیت آ زور شاغنگا کہ نیکی کننگ و انصاف اٹ راج انا ٹہیفنگ کن نرینہ و نیاڑی ہڑتوم آبریبرنا زموار ءُ۔ اوفتا کوشست آتے اللہ نا کنڈآن امنا کننگک و دانا اجر ملک۔ اوعلم و فہم نا جستجو ٹی زالبول آتا اہمیت ءِ تالان کروک آ حدیث مبارکہ نا ہم ذکر ءِ کرے ہرا راج اٹ بیداری ودی کننگ نا اسہ اہم پلو اسے۔ اوپارے کہ زالبول آتے مذہبی کمیونٹی تیٹی قائدانہ کڑد ادا کننگ کن واکدار کرسا نن نئے بیرہ اوفتا خذمت آتا شرف ءِ کینہ بلکن مذہبی گپ وتران نا جامعیت و گہرائی ءِ ہم مون آدینہ۔ بنجائی وزیر پارے کہ خذمت آتا بشخ ہراٹی جان جوڑی نا خیالداری، تعلیم، راجی کاریم و ایڈووکیسی اوار ءِ، کمیونٹی نا راجی آسودہی و شونداری کن المی ءِ۔ دا بشخ آتیٹی زالبول آتا شمولیت بدلی و اصلاح نا حامل مسنے و داسہ ہم المی ءِ۔