اسلام آباد۔ 03 ستمبر (اے پی پی) بنجائی وزیر کانود، انصاف وپارلیمانی امور سینیٹر اعظم نذیر تارڑ پارینے کہ ننا عدالتی نظام اٹی اصلاحات نا سخت گرج ءِ، مخلوق ءِ کیہی کیہی سال انصاف ملپک،اڑزآن انصاف نا کسر اٹ بروک آ اڑاند آتے چٹفوئی ءِ، دااصلاحات کن داایوان نا گڑاس زمواریک ءُ، عدلیہ ٹی چھٹی تا کانود انگریز نا دورآن چلینگسابننگ ءِ ہراتم بحری جہاز آتا کمک اٹ او ڈیوٹی تیا بسرہ و اوفتے تینا چناتتون ملنگ کن 8 ہفتہ ناچھٹی تننگاکہ، حکومت ہراتم کانود اس اتیک تو او علی الاعلان و ہرحال اٹ اتیک۔ سے شنبے نادے آ قومی اسمبلی ٹی دانیال چوہدری عدالت عظمیٰ ٹی جج آتا کچ (ترمیمی) بل 2024 ءِ پیش کننگ نا موکل خوائس۔ اوپارے کہ دابل ہراتم بس ہموتم آ آبادی 16 کروڑ ئس داسہ 25 کروڑ ءِ، سپریم کورٹ اٹی 34 ہزار کیس پدتموک ءُ، عدالت آ کیس آتا بھاریم ءِ۔ گوہر علی خان پارے کہ قاعدہ نا رداٹ داڑآ نجی بل اتنگ مفک، جج آتا کچ ءِ ودفنگ حکومت نا اختیار ءِ و حکومتی بل انا کمک اٹ ممکن ءِ۔ وزیرکانود اعظم نذیر تارڑ پارےکہ جج آتا کچ انا بابت بایدے شرہ مرے۔ داڑآ سینیٹ اٹی سرجمی اٹ گپ وتران مسنے، ننا آبادی 25 کروڑ و سپریم کورٹ اٹی جج آتا کچ 17 ءِ ، برطانیہ ٹی ہفت ءُ نیم کروڑ آبادی آ 12 جج ءُ، جج آتا اسپیشلائزیشن ہم اہم ءِ ، جج آتا چھٹی تا کانود انگریز نا دور انا ءِ ہراتم او بحری جہاز آتا کمک اٹ ڈیوٹی آ بسرہ و پدی تینا چناتتون ملنگ کن ہنارہ، داٹی بایدے بدلی برے۔ سینیٹ اٹی داوڑنا بل اس کمیٹی آ ہنانے، صوبائی حکومت کےپی نا کنڈآن اوار مروک ضلع غاتیان پد جج آتا کچ ءِ ودفنگ نا سلاہ بسوسس ہراڑآ اصولی اتفاق مسنے کہ 10 جج آتا ودکی بایدے مرے۔ وزیرکانود پارے کہ دادے موخر کننگے ، دُوارہ دادے ہریر۔ اوپارے کہ فوجداری پروسیجر و کانود شاہدی ٹی اصلاحات کن 5 تُو آن کاریم مننگ ءِ۔ اوپارےکہ ہرگڑاءِ تعصب نا نظراٹ بایدے ہُننگپ۔ اوپارےکہ حکومت ہراتم بل اس اتیک تو اوہرحال اٹ اتیک ، داپارلیمان نا اختیار ءِ کہ ہراوڑ کانود سازی اٹ گڑاتے ریگولیٹ کروئی ءِ ننے عدالتی اصلاحات نا گرج ءِ، اوڑآ بایدے سیاست کننگپ۔ بل ءِ پین سجفنگ کن موخرکننگا۔
