اسلام آباد۔ 11 ستمبر (اے پی پی) صدر مملکت آصف علی زرداری قائد اعظم محمد علی جناح ءِ اونا 76 می برسی آ شاندار لوز آتیٹی خراج عقیدت پیش کرسا پارینے کہ قائد اعظم محمد علی جناح ناجہد نئے بیرہ پاکستان نا جمہوری نظام نا بنداو ءِ تخا بلکن او اینو ہم پارلیمانی جمہوریت و بین المذاہب ہم آہنگی کن ننکن کسر نا ڈیواءِ، اونا رغاموک و راہشونی تیا عمل کرسا نن پاکستان ءِ سوگو و شونہال ملک اس جوڑ کننگ کینہ۔ صدر مملکت قائد اعظم نا برسی نا وخت آ تینا کلہو اٹی پارے کہ اینو نن قائد اعظم محمد علی جناح ءِ اونا 76 می برسی آ خراج عقیدت پیش کینہ، نن برصغیر نا مسلمان تیکن اسہ جتا ءُ وطن اسے نا دوئی کننگ کن اونا کوشست و کڑد انا منت واراُن۔ اوپارے کہ قائد اعظم اسہ ہندن ءُ وطن اسے کن جہد کرے ہراڑے مسلمان باوقار زند اس تیرکیر، و تینا سیاسی ، دودوربیدہ ئی و مذہبی حق ءِ کاریم اٹ اتنگ کیر۔ صدر مملکت پارے کہ قائد اعظم محمد علی جناح اسہ دوراندیش راہشون اس ئس ہرا ہندوستا ن نا مسلمان تے اسہ بیرک نا کیرغ یکجا کرے، مچ آ قوم حق خودارادیت کن قائد ناسخت جہد و بدل مفروک عزم ءِ خراج تحسین پیش کیک۔ اوپارے کہ قائد اعظم تیناسخت جہد نا سوب آن کروڑآ مسلمان تا تقدیر ءِ بدل کرے، پاکستان کن قائد اعظم نا وژن بنداوی وڑاٹ جمہوری ئس و او اسہ ہندن ءُ ریاست اسے نا خواہندار ئس ہراڑے غٹ شاری کانود نا مون آ بریبرمریرہ۔ آصف علی زرداری پارےکہ قائد اعظم محمد علی جناح نا جہد نئے بیرہ پاکستان نا جمہوری نظام نا بنداوءِ تخا بلکن او اینو ہم پارلیمانی جمہوریت و بین المذاہب ہم آہنگی کن ننکن کسر نا ڈیواءِ۔ صدر مملکت پارےکہ قائد اعظم ہندوستان نا پیچیدہ سیاسی منظرنامہ ٹی ہندوستان نا مسلمان تا سرسہبی اٹ راہشونی ءِ کرے ومسلمان تا حق انا بارواٹی تینا بدل مفروک موقف ءِ برقرارتخا، اونا سوگو قوت ارادی، خواری و مسلمان تا سرسہب وکالت نا سوب آن ہی ہندوستا ن نا تقسیم اسہ حقیقت اس جوڑمس۔ صدر مملکت پارے کہ اینونادے نن نئے بیرہ اونا کوشست آتے امنا کینہ بلکن قائد نا قدر و نظریہ غاتیکن تینے وقف کینہ۔ اوپارے کہ قائد اعظم جمہوریت و راجی و اقتصادی انصاف نا اسلامی اصول آتیا تالان پاکستان نا خواہندار ئس، ننے تیناملک انا شونداری کن ’’سیوت‘‘ ایمان ونظم وضبط‘‘ نا اصول آتے کسر نا ڈیواجوڑ کننگ نا گرج ءِ۔ صدر مملکت دایقین نا درشانی ءِ کرے کہ قائد اعظم نا رغاموک و راہشونی تیا عمل کرسا نن پاکستان ءِ سوگو و شونہال ملک اس جوڑ کننگ کینہ۔
