اسلام آباد۔ 10 ستمبر (اے پی پی) صدر مملکت آصف علی زرداری راج انا محروم و پسماندہ تپہ غاتے مفت طبی و جان جوڑی نا آسراتی فراوان کروک آ عبدالقدیر خان ہسپتال ٹرسٹ ءِ تینا کمکاری نا باوری کرفسا ضرورت مند مخلوق ءِ رسینگ نا قابل جان جوڑی نا آسراتی تیا ٹرسٹ نا خذمت آتا ستاءِ کرینے۔ ایوان ءِ صدر نا پریس ونگ آن جاری بیان نا رداٹ صدر مملکت داخیال آتا درشانی ءِ عبدالقدیرخان ہسپتال ٹرسٹ نا چیئرپرسن ڈاکٹر دیناخان نا کماشی ٹی ڈل اتون گپ وتران کرساکرے ہراسے شنبے نادے آ اوڑتون داڑے ایوان صدر اٹی اوڑدہی کرے۔ اوڑدہی ٹی قومی اسمبلی نا باسک آصفہ بھٹو زرداری ہم ساڑی ئسک۔ صدر مملکت پارے کہ ڈاکٹر عبدالقدیر خان نا قوم اکن خذمت آتیا مچ آ قوم اونا مقروض ءِ۔ ڈاکٹر دینا خان صدر مملکت ءِ الس ءِ طبی خذمت آتا فراوانی ٹی ہسپتال نا کارکڑد نا بارواٹی معلومدار کرے۔ ڈل صدر مملکت ءِ ٹرسٹ ءِ مون تروک ویل آتیان ہم معلومدار کرے۔ ڈل پارے کہ مسکہوی ٹرسٹیز مالی غبن کرے و ٹرسٹ انا اکاؤنٹ آتے غلط کاریم اٹ ایس۔ صدر آصف علی زرداری ڈل ءِ اوفتا ویل آتا ایسری نا باوری کرفے۔ صدر مملکت ڈاکٹر عبدالقدیر خان ہسپتال ٹرسٹ نا خذمت ومخلوق نا کنڈآن عطیہ غاتا ستاءِ کرے۔
