اسلام آباد۔ 08 اکتوبر (اے پی پی) بنجائی وزیر داخلہ محسن نقوی پارینے کہ شنگھائی کمکار تنظیم نا سروکی دیوان نا پاکستان اٹ اڈتننگ حکومت نا سرسہب خارجہ پالیسی تا ڈیک ءِ، مچ آ اسلام آباد خاص کر وی آئی پی روٹ و ریڈزون نا زیبائی و سفائی آخاص چکار کننگے۔ اوسے شنبے نادے آ شنگھائی کمکار تنظیم دیوان نا سیکورٹی بست وبند آتا بابت دیوان آن تران کریکہ۔ آئی جی اسلام آباد علی ناصر رضوی، چیئرمین سی ڈی اے محمد علی رندھاوا، ڈپٹی کمشنر اسلام آباد عرفان نواز میمن تون اوار ایلو تعلقدار ادارہ غاتا کمامدارآک داوخت آ ساڑی ئسر۔ دیوان اٹی شنگھائی کمکار تنظیم نا سروکی دیوان نا تیاری و بست وبند آتا جاچ ءِ ہلنگا۔ دیوان اٹی اسلام آباد نا زیب وزینت و ایلو ڈٹ آتیا پیش رفت نا ہم جاچ ءِ ہلنگا۔ وزیرداخلہ محسن نقوی ریڈزون خاص کر وی وی آئی پی روٹ آتا بیوٹی فیکشن ءِ پک کننگ ناپارت کرساپارے کہ اہم شاہراہ تا کنڈآ دیدہ زیب لینڈ سکیپنگ کننگے۔ مچ آ شار ءِ زیباانگا پھل و فینسی لائت آتے اٹ بیرفنگے۔ وزیرداخلہ جناح کنونشن سینٹر نا تزئین و آرائش نا فنشنگ نا کاریم ءِ زوت پورو کننگ نا ٹاسک ترساپارے کہ تزئین و آرائش و تعمیراتی کاریم تے زوت آن زوت پورو کننگ کن المی پارت تس۔ دیوان اٹی ایس سی او سروکی دیوان نا بابت سیکورٹی بست وبند آتا ہم جاچ ءِ ہلنگا۔
