اسلام آباد۔ 11 ستمبر (اے پی پی) بنجائی وزیر حوالکاری ، شینکاری ، قومی میرات و دودوربیدہ عطاء اللہ تارڑ پارینے کہ زالبول آتا میرات اٹی حق ننا کلچر نا غٹ آن بھلا ویل ءِ، زالبول آتے اوفتا حق آن محروم کننگک، ایلم ایڑھ تے میرات اٹی بشخ تننگ آن نمن مریرہ، ننے داکلچر ءِ بدل کننگ کن تینا سوچ ءِ بدل کروئی مریک، اسلام پائک کہ میرات اٹی زالبول ءِ بشخ تننگک۔ چارشنبے نادےآ قومی اسمبلی نا دیوان اٹی بنجائی دارالحکومت اسلام آباد اٹی میرات اٹی زالبول آتا کانودی بشخ انا عدالتی پرمان تیا عملدرآمد کپننگ نا بابت قومی اسمبلی نا باسک آسیہ ناز تنولی ، صباصادق، نوشین افتخار، احمد عتیق انور و کرن عمران ڈار نا چکاری نوٹس نا ورندی ءِ ترسا بنجائی وزیر حوالکاری پارےکہ زالبول آتیکن میرات نا حق انا باندات بھاز اہمیت تخک، زالبول آتے میراتی حق ننا کلچر نا غٹ آن بھلا ویل ءِ، میرات نا کانود اٹی زالبول آتے داحق آن محروم تخنگ نا ہچ ءُ گنجائشت اس اف ولے ننا داڑے کلچر جوڑ مسنے کہ مسن تا تعلیم، برام آ خڑچ کننگے تو سمجھنگک کہ زمواری پورو مسنے و اوفتےمیراتی باندات آتیٹی اوفتا حق آن محروم کننگک۔ اوپارےکہ ننے داکلچر ءِ بدل کننگ کن تینا سوچ ءِ بدل کروئی مریک، دامنا کروئی مریک کہ نیاڑی ءِ اونا حق بایدے ملے، اوپارےکہ Succession Certificate سرٹیفکیٹ تننگ نا اختیار نادرا تون ءِ، ڈیتھ سرٹیفکیٹ ، بیان حلفی، ایف آرسی و سکسیشن سرٹیفکیٹ ہلنگ آن پد میرات اٹی پن تے نوشتہ کننگک، اسہ زالبول اس ہم میرات نا حق آن محروم سلپ، داڑکن مہم اس چلیفنگ کن تیار اورے۔ اوپارے کہ اسلام لازم کیک کہ میرات اٹی زالبول ءِ بشخ تننگک۔ اوپارے کہ منہ دےمست اسلام آباد نا دنگ اٹی اسہ زالبول اسے آ تیزاپ چٹ تننگا، زالبول بھاز بے وڑ ہُشنگا، ننا اسہ ڈل اس پمز ہسپتال اوزالبول نا تیمارداری کن ہنا، ہراتم اَرفنگا تو زالبول نا کریکٹر آ سوج بش مننگ نا بناءِ کننگا۔ اوپارےکہ کس اسے حق اف کہ او زالبول اسے آ تیزاپ چٹ ایتے۔ بنجائی وزیر پارےکہ زالبول آتا حق خاص کر خلقی علاقہ غاتیٹی آگاہی بایدے مرے، خلقی علاقہ غاتیٹی گیشتر زالبول آک تینا حق آن معلومدار افس ،ایلم ایڑھ تے میرات نا تہہ ٹی بشخ تننگ آن نمن مریرہ، دابابت پین ریفارمز اتنگ مریک۔ اوپارے کہ اللہ تعالیٰ نا شکر ءِ کہ ننا داڑے انڈیاوالا حالیت اف، ہمیڑے زالبول آتے تینا حق مشکل اٹ ملک۔ اوپارے کہ نن ہموزمانہ ٹی زالبول وزیراعظم ءِ گچین کریسن ہراتم دیکی نا تہہ ٹی زالبول آتے ایگزیکٹیو پوزیشن تننگ نا تصور ہی الوکہ۔ بنجائی وزیرپارے کہ زالبول آتا حق انا باندات آ اسپیشل کمیٹی اس جوڑ کننگے، دابابت گچینی نا گنجائشت ساڑی ءِ۔ اوپارے کہ زالبول آتا برخلاف بیدادی نا واقعہ اس پیش برے تو چندی بہانہ جوڑ کننگک، ننےدا سوچ ءِ بدل کننگ نا گرج ءِ ۔ اوپارے کہ ہرویمن ڈے آ گام گیج و پیکج آتا پڑو ءِ کننگک، پنک بس آتا تصور ءِ نن بنجاو سندھ اٹی خنانن، کنا خواست ءِ کہ زالبول آتا حق انا بارواٹی اسپیشل کمیٹی اس جوڑ کننگے و غٹ جماعت آتون سلابت کننگے تانکہ دا باندات ءِ مون آ دننگ مرے۔ بنجائی وزیر قومی اسمبلی نا باسک شاہدہ رحمانی نا زالبول آتا حق انا باندات ویمن کاکس آ گدریفنگ نا سلاہ نا مخالفت ءِ کرسا پارےکہ دا باندات بھا زاہم وڑنا ءِ، داڑآ پارلیمان نا خصوصی کمیٹی اس بایدے جوڑ مرے۔
