اسلام آباد۔ 11 ستمبر (اے پی پی) بنجائی وزیر حوالکاری، شینکاری ، قومی میرات و دودوربیدہ عطاء اللہ تارڑ پارینے کہ دنیا نا چندی ملک آتیٹی ننا 93 پاسپورٹ آفس جوڑ ءُ، اوغانستان اٹی ننا ہچ ءُ پاسپورٹ آفس اس اف، پاسپورٹ آفس آبادی نا رداٹ جوڑ کننگک، نجی ماڑی تا ماسٹر پلان اٹی ہراتم اسکان فائر سیفٹی پلان مفک، او ماڑی تا منظوری ءِ تننگ مفک، فائر سیفٹی نا بابت ریگولیشنز آ بایدے عمل مرے۔ او چارشنبے نادے آ قومی اسمبلی نا دیوان اٹی وقفہ سوج آتیٹی باسک آتا ضمنی سوج آتیا ورندی تسکہ۔ قومی اسمبلی نا باسک سحرکامران نا ضمنی سوج آ بنجائی وزیر حوالکاری پارے کہ 10 جولائی آ ایچ نائن نا خڑک بازار اٹی خاخر لگنگ نا واقعہ پیش بس ہراٹی کم و ود 28 کروڑ نانسخان مس۔ خاخر سولر سسٹم خلنگ نا ہیبدار بیٹری نا ترخنگ نا سوب آن لگا۔ انکوائری کمیٹی رپورٹ گدریفینے۔ 2010 ء ٹی پیپلزپارٹی نا حکومت اٹی ہی فائر پریوینشن اینڈ لائف سیفٹی ریگولیشنز جوڑ مسوسس، ہرافتے ٹی گچین جہانی وڑوڈول آتے اوار کننگاسس۔ اوپارے کہ سی ڈی اے ءِ پارت جاری کرینن کہ او تینا لائخی تیٹی ودکی کے و ہراڑے ہراڑے خاخر کسفنگ نا ازباب ساڑی ءِ، اوفتا پورو آڈٹ ءِ کننگے، دا ریگولیشنز غٹ بازار و پبلک ہند آتیا لاگوکننگے۔ اخس کہ پرائیویٹ ماڑی تا ماسٹر پلان منظوری کن بریک، ہراتم اسکان فائر سیفٹی پلان نصب مفک، اوماڑی تا منظوری ءِ تننگ مفک۔ اوپارےکہ بازار آتیٹی چنکا اسٹال آتیا خاخر کسفنگ نا ازباب آتا خلنگ نا ویل ہم مون تروک ءِ، داپک کننگک کہ آخبت اٹ داوڑناواقعہ غاتیان بچنگ مرے۔ قومی اسمبلی نا باسک رفیع اللہ نا ضمنی سوج آ بنجائی وزیر حوالکاری پارے کہ ہراتم کم آن کم اجرت نا تعین ءِ کننگک تو چائے ہڑدے ئی اجرت یا کنٹریکٹ آ ملازم مرے، اودے اسہ تُو اٹی 37 ہزار روپئی اداکروئی مریک۔ اوپارے کہ اے پی این ایس و پاکستان براڈ کاسٹرز ایسوسی ایشن آن ہم خواست کرینن کہ غٹ میڈیا ہاؤس آتیٹی کم آن کم اجرت نا کانود آ عمل کننگے۔ قومی اسمبلی نا باسک طاہرہ اورنگزیب نا ضمنی سوج آ بنجائی وزیر پارے کہ 93 پاسپورٹ دفتر دنیا نا چندی ملک آتیٹی جوڑ ءُ، اوغانستان اٹی نناہچ ءُ پاسپورٹ آفس اس اف، پاسپورٹ دفترآتا جوڑ کننگ آبادی نا رداٹ مریک، ہراڑے پاکستانیک زیات ءُ ہموڑے پاسپورٹ آفس جوڑ کننگک۔ مالٹا نا باندات آ ویزہ غاتا بابت سائیڈ لائن میٹنگ بایدے مرے، وزارت داخلہ نا ایڈیشنل سیکرٹری ءِ بٹنگسا داویل ءِ ایسر کرفنگک۔ گیشتر ویزہ غاتیٹی دا ویل بریک، کناکوشست مریک کہ دا ویل ءِ داسہ ایسر کننگے۔
