اسلام آباد۔ 11 ستمبر (اے پی پی) وزیراعظم محمد شہباز شریف پارینے کہ مچ آملک آن گچین ٹیلنٹ نا جہانی کہول آ پاکستان نا نمائندگی اسہ اعزاز اسے، حکومت ملک اٹی فٹ بال نا گوازی نا مون آ دننگ کن پورو کمک کیک۔ داخیال آتا درشانی ءِ او زوت آتے اٹ ناروے ٹی پاکستان نا نمائندگی ءِ کروک آ گچین کارکڑد تخوک سٹریٹ چائلڈ فٹ بال ٹیم اتون گپ وتران کرساکرے، ہراچارشنبے نادے آ داڑے اوڑتون اوڑدہی کریر۔ اوڑدہی ٹی کیپٹن محمد عدیل، ٹاپ سکوررمحمدکاشف، ٹیم منیجر سید محمد اویس، مسلم ہینڈز نا ایگزیکٹیو ڈائریکٹر سید جاوید گیلانی، ڈائریکٹر گلوبل آپریشنز ارسلان نصرت ، کمیونیکیشن ڈائریکٹر محمد ریحان طاہر ئسک ہم ساڑی ئسر۔ داوخت آ بنجائی وزیر حوالکاری وشینکاری عطاء اللہ تارڑ، وزیر مملکت انفارمیشن ٹیکنالوجی شزہ فاطمہ خواجہ، چیئرمین وزیراعظم یوتھ پروگرام رانا مشہود احمد خان،وزیراعظم نا کوآرڈی نیٹر زرومینہ خورشید عالم و بدر شہباز تون اوار اوار تعلقدار بڑزکو کمامدار آک ہم ساڑی ئسر۔ وزیراعظم پارے کہ پاکستان سٹریٹ چائلڈ فٹ بال ٹیم نا گوازی گر مچ آ دنیا ٹی پاکستان نا پن ءِ روشنا کننگ ءُ، نم غٹ گوازی گرآک پاکستان نا روشنا ستارہ غاک اورے، نما گچین کارکڑد داہیت انا گواہی ایتک کہ پاکستانی ورناتے موقع ملے و او مچ آ دنیا ٹی تینا لائخی تے منفرہ۔ اوپارے کہ حکومت پورووڑاٹ نما کمک ءِ کیک، پاکستان اٹ فٹ بال نا شونداری کن ہرممکن گام گیج کیک، بھاز زوت پاکستان اٹ فٹ بال نا شونداری کن اسہ جامع پلان اسے نا نفاذ نا بناءِ کینہ۔ وزیراعظم مسلم ہینڈز نا پاکستان سٹریٹ چائلڈ فٹ بال نا شونداری کن گام گیج آتا ستاءِ کرے۔ گوازی گر آک وزیراعظم نا منت واری ءِ ہرفیر۔ وزیراعظم ءِ مسلم ہینڈز نا کنڈآن پاکستان و مچ آ دنیا ٹی سٹریٹ چائلڈ فٹ بال کن گام گیج آتیا حوال ہم تننگا۔ وزیراعظم تعلقدار کمامدارآتے اولیتی بنداوتیا محکمانہ گوازی تے پورووڑاٹ بحال کرسا رپورٹ پیش کننگ نا پارت کرے۔
