بنجائی وزیر ڈٹ بندی احسن اقبال نا جمہوریت نادے انا وخت آ کلہو

اسلام آباد۔ 15 ستمبر (اے پی پی) بنجائی وزیر ڈٹ بندی احسن اقبال پارینے کہ پاکستان نا روشنا آخبت جمہوری عمل نا چرجوئی وادارہ غاتا سوگوی تون گنڈوک ءِ، ننے تین پہ تینی اختلاف آتے است آن درسا جمہوری ادارہ غاتے سوگو کروئی مریک، مستین اٹ وار وار جمہوری عمل اٹی تعطل ودی کننگا ہرانانتیجہ سیاسی نزوری، زرگزرانی بدحالی نا دروشم اٹ ننا مون آٹی ءِ، ننے غٹ ءِ اواری اٹ جمہوری عمل نا مون آ دننگ و زرگزرانی شونداری کن کاریم کروئی مریک۔ بنجائی وزیر ڈٹ بندی احسن اقبال جمہوریت نا دےانا وخت آ شنبے نادے آ تینا بیان اٹی پارے کہ شونداری نا ہراکہ بشخ مرے اینو جہانی مسابقت اٹ پاکستان بھاز پدی ءِ، ننے خواری، جدت، آب وعلم آ تالان زرگزران ءِ مون آ درسا شونداری نا کسر ءِ تینا کروئی مریک۔ اوپارےکہ پوسکن آ دنیا نا ہندا تصور جمہوریت ءِ کہ شونداری نا عمل اٹ کس اس پدی سلپ۔ بنجائی وزیرپارے کہ ملکی شونداری نا عمل اٹی شفافیت ءِ تینا کرسا راج انا غٹ تپہ و زند انا بشخ آن تعلق تخوک آ بندغ آتے اوار درسا چلینگ انگ جمہوریت نا حقی روح ءِ۔ احسن اقبال مستی پارےکہ نن اقتدار اٹ بننگ تون پارلیمان نا تہہ و پیشن پاکستان کن دڑد تخوک آ خوانوک آ بندغ آتون سلابت نا عمل نا بناءِ کرین، 2022اٹی اسہ ہزار آن زیات تہہ و پیشن نا ملک رہینگوک چندی زند انا بشخ آتیان تعلق تخوک آ چاہندار آتون سلابت اٹی 5 ایز فریم ورک اس جوڑ کرین۔ اینو ایز 5 ایز فریم ورک نا عملی تنفیذ کن نن 13 می پنچ سال انا ڈٹ آتے گڈیکو دروشم اس تننگ نا گڈیکو ریسہ ٹی پترینگانن، دا مسخت کن نن نجی، کاروباریو راجی بشخ آتیان تعلق تخو ک آ چاہندار آتیاپالیسی بورڈ اس جوڑ کرینن تانکہ شونداری نا بابت اسہ پلو اس ہم سلپ۔ اوپارے کہ ننا پکا عزم ءِ کہ پاکستان ءِ 2035 اسکاناسہ کھرب ڈالر نا زرگزران جوڑ کینہ۔ ننے داعمل نا پورویکن جمہوری سوگوی و پالیسی تا تسلسل نا گرج ءِ، ننے داعمل اٹی اڑاند شاغوک آ غٹ زموار آتا ہرچال ءِ بے سہب کروئی مریک۔ ننے جمہوری عمل ءِ شونداری اتون مربوط کروئی مریک، ہندا ننا بقا و سرسہبی نا کسر ءِ۔