اسلام آباد۔ 15 ستمبر (اے پی پی) چین اٹی جہانی واپاری کانفرنس اٹی پاکستان آ ن 150 چندی کاروباری مندوبین آک بشخ ہلنگ اٹی ءُ، وزیراعظم شہباز شریف نا جون نا دورہ ءِ چین نا مثبت و پیدوار اثر مون آبننگ بناکرینے۔ وزارت واپار نا کنڈآن جاری اعلامیہ نا رداٹ بنجائی وزیرواپار جام کمال و بنجائی وزیر زرکاری بورڈ عبدالعلیم خان جہانی واپاری میلہ غان ویڈیولنک آ تران کریر۔ بنجائی وزیر آک پاریر کہ چین وپاکستان اسہ جون اِرا است ءُ، آخبت اٹ ہڑتوم آ کنڈآتا کمکاری پین ودک۔ جام کمال خان پارےکہ پاکستان نا وزارت واپار بزنس کمیونٹی تون پورو وڑاٹ ’’آن بورڈ‘‘ ءِ، پاکستان و چین نا نیام اٹ واپاری کچ ءِ پین ودفنہ، داکانفرنس آن آخبت اٹ پاک چین کمکاری نا پوسکن ءُ کسر ملنگک۔ بنجائی وزیر عبدالعلیم خان تینا تران اٹی پارےکہ زرکاری کن پاکستان اٹی چاگڑد سازگار، گچین ءُ بھرم اس مون آ بریک، چین آن صنعت آتا گدریفنگ ستاکڑزوک، کاروباری برادری ءِفائدہ رسینگک۔ چین نا انٹرنیشنل کانفرنس اٹی پاکستان نا پبی نمائندگی است بڈ ہیت اسے۔ وزارت واپار نا پارت آ بیجنگ اٹی پاکستانی سفارت خانہ واپاری ڈل آتا پبی مہمانداری ءِ کرے، بنجائی وزیر عبدالعلیم خان و جام کمال خان سرسہب کانفرنس نا اڈتننگ آ سفارتی عملہ نا کوشست آتا ستاءِ کریر۔
