کوئٹہ۔ 11 ستمبر (اے پی پی) بلوچستان نا علاقہ تربت بازار اٹی دھماکہ ٹی زالبول اسے تون اوار 5 بندغ ٹھپی مسر۔ پولیس نا رداٹ چارشنبے نادےآ ضلع کیچ نا ہیڈکوارٹر تربت بازار اٹی اناگت زوردار دھماکہ مس ہراٹی ظریف، ظفر، عدنان، اویس و اسہ زالبول اس ٹھپی مس۔ حوال ملنگ تون پولیس وکمکی ٹیمک سرمسر۔ دھماکہ غان پد بمب ڈسپوزل سکواڈ ءِ دمدستی وڑاٹ بٹنگ انگا۔ دھماکہ ٹی ٹھپی مروک آتے ہندی ہسپتال آ گدریفنگا ہراڑے اوفتے بنائی طبی امداد تننگ انگ ءِ۔ داکان بیدس حکومت بلوچستان نا ترجمان شاہد رند تربت بمب دھماکہ نا مذمت کرساپارینے کہ صوبائی حکومت دھماکہ نا جاست وپاست ناپرمان کرے۔ تینا بیان اٹی اوپارے کہ حکومت بلوچستان نا کنڈآن محکمہ داخلہ ءِ جاست وپاست نا پرمان کننگا۔ ترجمان نا رداٹ بمب ڈسپوزل سکواڈ نا ٹیم موقع غا سرمسنے ہرا دھماکہ نا وڑانا تعین ءِ کیک۔ اوپارے کہ ٹھپی تے گچین طبی آسراتی فراوان کننگ انگ ءِ۔
