کوئٹہ۔ 10 ستمبر (اے پی پی) صوبائی دارالحکومت کوئٹہ تون اوار مچ آ بلوچستان اٹی 7 دے ئی انسداد پولیو مہم ارٹ میکو دے آ ہم برجاسلیس۔ ایمرجنسی آپریشن سینٹر بلوچستان نا کوآرڈی نیٹر انعام الحق نا رداٹ کوئٹہ تون اوار مچ آ بلوچستان اٹی 7 دے ئی انسداد پولیومہم 9 ستمبر آن بناکریسس ہرا 10 می ستمبر آ ارٹ میکو دے آ ہم برجاسلیس۔ انعام الحق پارے کہ اولیکو دے ہچ ءُ ناخوشگوار واقعہ اس پیش بتنے، ہرضلع نا انتظامیہ نا کنڈآن سیکورٹی کن پبی گام گیج کننگانے، دا مہم صوبہ ٹی ساڑی آ پولیو کیس و چاگڑدی وڑتیٹی پولیو دین نا ساڑی گری نا رداٹ بناکننگانے۔ مہم اٹی 26 لکھ 55 ہزار آن زیات چناتے پولیو آن بچفنگ نا پڑی کنفنگک پولیو مہم اٹی 11 ہزار 555 نا خڑک ٹیم بشخ ہلیرہ۔ ہرافتے ٹی 9 ہزار 247 موبائل ٹیم، 945 فکسڈ سائٹ و 595 ٹرانزٹ پوائنٹ اوار ءُ۔ اوغٹ لمہ وباوہ غاتیان خواست کرے کہ صوبہ ٹی پولیو کیس نا ساڑی گری نا سوب آن لمہ و باوہ داخصوصی مہم اٹی پولیو ٹیم اتون تینا کمکاری ءِ پک کیر، انعام الحق پارے کہ سول سوسائٹی، استاد و عالم دینک خصوصی وڑاٹ دامہم اٹی تینا کمکاری ءِ پک کیر۔ یات سلے کہ بلوچستان اٹی مسہ سال آن پد برجاسال چمن، ڈیرہ بگٹی، قلعہ عبداللہ، کوئٹہ، جھل مگسی، ژوب، قلعہ سیف اللہ و خاران ٹی پولیو نا 12 کیس رپورٹ مسنو۔
