اسلام آباد۔ 10 ستمبر (اے پی پی) اسپیکر قومی اسمبلی سردار ایاز صادق آئی جی اسلام آباد ءِ کانودی وڑوڈول نا رداٹ دزگیر قومی اسمبلی ان باسک آتے پارلیمنٹ اٹ پیش کننگ نا پرمان کرسا پارت کرینے کہ غٹ دزگیر باسک آتون مہذب برتاؤ و گچین آسودہی فراوان کننگے، تدوک آدے انا واقعہ نا پورو جاست وپاست ءِ کننگک۔ داخیال آتا درشانی ءِ او سے شنبے نادے آ پارلیمانی جماعت آتا راہشون و باسک آتون تینا چیمبر اٹی اوڑدہی ٹی کرے۔ داوخت آ پارلیمنٹ نا باسک آک قومی اسمبلی نا باسک آتا پارلیمنٹ آن دزگیری تا بابت گپ وتران کریر و اسپیکر آن خواست کریر کہ داواقعہ غا سخت ایکشن ہلنگے۔ اسپیکر قومی اسمبلی سردار ایاز صادق داباندات ءِ غٹ جماعت آتون اواری اٹ ایسر کننگ نا عزم انا درشانی ءِ کرے۔ داوخت آ غٹ جماعت آک داوڑنا باندات آتون مون تننگ کن اسہ جوا ن ءُ ضابطہ کار اس جوڑ کننگ آہم امناکریر۔ اسپیکر ناپاننگ ئس کہ درونا واقعہ است بھاز رنجیدہ ءِ، پارلیمنٹ نا غٹ باسک آک کنکن بھاز شرف نا قابل ءُ، پارلیمنٹ نا وقار آ ہچءُ سمجھوتہ اس مفک، اسمبلی نا باسک آتا دزگیری ا حوال آک بھاز تشویشناک ءُ۔ اوپارےکہ پارلیمنٹ آن دزگیری تا بابت دمدستی و پورو جاست وپاست نا پرمان جاری کرینے۔ اسپیکر قومی اسمبلی ائی جی اسلام آباد ءِ تینا چیمبر آ بٹنگسا واقعہ نا بابت معلومداری ہم دوئی کرے و آئی جی ءِ پارت کرے کہ کانودی وڑوڈول نا رداٹ غٹ دزگیر باسک آتے پارلیمنٹ اٹ پیش کننگے و دزگیر باسک آتون جوان برتاؤ کننگے و اوفتے گچین آسراتی فراوان کننگے۔ اسپیکر نا پاننگ ئس کہ درو نن نا واقعہ نا پورو جاست پاست کننگک، داواقعہ نا فوٹیج ءِ دوئی کننگ انگ ءِ۔ اسپیکر آئی جی اسلام آباد آن واقعہ نا دمدستی و پورو رپورٹ ہم بٹنگاو پارے کہ پارلیمنٹ نا تقدس و شرف غٹ آ لازم ءِ۔ اسپیکر تون اوڑدہی کروک آتیٹی بنجائی وزیر اعظم نذیر تارڑ، عبدالعلیم خان، وزیراعظم نا سلاہکار رانا ثناء اللہ، قومی اسمبلی نا باسک سید خورشید احمد شاہ، سید نوید قمر ، طارق فضل چوہدری نور عالم خان ، شاندانہ گلزار، خالد حسین مگسی، وزیرمذہبی امور چوہدری سالک حسین ، سید امین الحق، امجد علی خان ، شاہدہ اخترعلی ، علی محمد خان ، سنی اتحاد کونسل نا سروک صاحبزادہ حامد رضا و ایلوفک اوار ئسر۔
