اسلام آباد۔ 21 اگست (اے پی پی) وزیراعظم محمد شہباز شریف پارینے کہ اسمگلنگ ناناسور ءِ ملک آن پورو چٹفنگ کن غٹ ادارہ غاک تینا کوشست آتے ترند کیر۔ اسمگلنگ اٹی اوار بندغ آتے پاکستان نا زرگزران ءِ نسخان تننگ کن الیپنہ۔ چارشنبے نادے آ وزیراعظم آفس نا میڈیاونگ آن جاری بیان نا رداٹ داخیال آتا درشانی ءِ او تینا کماشی ٹی اسمگلنگ نا توننگ نا بابت جاچ دیوان اٹی گپ وتران کرساکرے۔ دیوان اٹی بنجائی وزیر جام کمال خان، احد خان چیمہ، محمد اورنگزیب، عطاء اللہ تارڑ، سید محسن رضانقوی، رانا تنویرحسین، ڈاکٹر مصدق ملک، ڈپٹی چیئرمین پلاننگ کمیشن جہانزیب خان، وزیراعظم نا کوآرڈی نیٹر رانا احسان افضل، ہرچار آ صوبہ غاتا سیکرٹریک و تعلقدار بڑزکو کمامدارآک بشخ ہلکر۔ دیوان اٹی وزیراعظم اسمگلنگ نا برخلاف گام گیج آتے پین گچین و ترند کننگ نا پارت کرینے۔ وزیراعظم پارے کہ اسمگلنگ اٹی اوار بندغ آتے اسل پاکستان نا زرگزران ءِ نسخان تننگ کن الیپنہ، اسمگلنگ نا توننگ کن پوسکن آٹیکنالوجی ءِ کاریم اٹ اتنگ ءِ پک کننگے، اسمگلنگ اٹ اوار زموار و اوفتا کمکار آتون اوار اوار ٹرانسپورٹر آتا اسمگلنگ اٹ کاریم اٹ اتوک آ گاڈی تے ضبط کرسا اوفتا برخلاف کانودی کارروائی کننگے۔ وزیراعظم پارے کہ ستاکڑزوک ءُ ہیت اسے کہ تعلقدار ادارہ غاتا کارروائی تیٹی اسمگلنگ اٹی کمتی واقع مسنے۔ ایف بی آر، وزارت داخلہ و ایلوو ادارہ غاک اسہ ایلو تون کمکاری ءِ پین گچین کیر۔ اوپراے کہ سیمی علاقہ غاتیٹی مخلوق ءِ روزگار نا گچین وارخواہی فراوان کننگ کن اسہ جوان ءُ حکمت عملی اس جوڑ کرسا پیش کننگے، اسمگلنگ نا ناسور ءِ ملک آن پورو چٹفنگ کن غٹ ادارہ غاک تینا کوشست آتے ترندکیر۔ دیوان ءِ اسمگلنگ نا توننگ و اونا داتم اسکان نا نتیجہ غاتیا سرجمی اٹ حوال تننگا۔ حوال اٹی پاننگاکہ وزارت داخلہ نا چاروکی ٹی اسمگلنگ نا توننگ کن ملک گیر مہم برجاءِ۔ پیٹرولیم مصنوعات، سگریٹ، موبائل فون، خیسن، چاہ، پچ، المی آ گڑا، ٹیر و گاڈی تا پُرزہ غاتا اسمگلنگ نا برخلاف گچین گام گیج کننگ انگ ءِ۔ انسدادِ اسمگلنگ نا دنگ اٹ المی آ گڑاتتون اوار اوار ایلو گڑاتے ہم اوار کننگانے، یوریاو بورہ نا اسمگلنگ نا توننگ کن ویب پورٹل نا بناءِ کننگانے۔ حوال اٹی پاننگاکہ وزیراعظم نا پارت نا رداٹ 54 اسیجائی چیک پوسٹ جوڑ کننگانے، نان کسٹم گاڈی تا پیدواری و اوفتا میپنگ کن نظام نا اجرا گڈیکو ریسہ غاتیٹی ءِ، پاکستان لینڈ پورٹ اتھارٹی نا جوڑ کننگ کن کانود سازی نامسودہ گڈیکو ریسہ غاتیٹی ءِ۔ دیوان ءِ انسداد اسمگلنگ نامہم نا داتم اسکان ناکارکڑد آ رپورٹ ہم پیش کننگا۔ اوغان ٹرانزٹ ٹریڈ اٹی اوار 212 ہموگڑا ہرافتا اسمگلنگ نا خطرہ مون تروک ئس، نا پیدواری ءِ کرسا اوفتیا پابندی خلنگانے۔ اوغان ٹرانزٹ ٹریڈ کن انشورنس گارنٹی نا جاگہ غا بینک گارنٹی ءِ المی گوندنگانے۔ المی آ گڑاتا اسمگلنگ اٹ خاطر خواہ کمتی اتون اوار اوار پیٹرولیم مصنوعات نا اسمگلنگ اٹ 50 درسد اسکان کمتی واقع مس۔ بورہ نا اسمگلنگ اٹ 80 درسد کمتی اتون اوار اوار ایلو کنوئی آ گڑاتا اسمگلنگ اٹ ہم پیدوار کمتی مس۔ مالی سال 2023-24اٹی اسمگلنگ نا کوشست آتے بے سہب کرسا ضبط کروک آ گڑاتا مالیت 106 ارب روپئی ءِ۔ انسداد اسمگلنگ مہم نا سوب آن ملک اٹی کوڑی کننگ نا کچ اٹی ہم کمتی مس۔ اسمگلنگ اٹ ملی بھگت کروک آ آفیسر آتا برخلاف کارروائی نا بابت ہم دیوان ءِ سرجمی اٹ معلومدار کننگا۔ اسمگلنگ اٹ اوار زموار، ٹرانسپورٹر و اوفتا کمکار آتا پیدواری نا عمل ترندی اٹ برجاءِ، دا بابت نادرا ، ایکسائز و ایلو ادارہ غاتا ڈیٹا بیس اٹ ہم کمک ہلنگ انگ ءِ۔
